Tesla’нинг Европадаги савдолари февраль ойида 40 фоизга тушиб кетди

Tesla сўнгги ойларда Европада катта муаммоларга дуч келмоқда. Bloomberg берган маълумотга кўра, Илон Маск бошчилигидаги компания 2025 йил февраль ойида атиги 16 888 та янги автомобиль сотди, бу эса ўтган йилнинг шу даврига нисбатан 40% га кам демакдир. Tesla’нинг савдоси йилнинг дастлабки икки ойида 43% га пасайган бўлса, бутун электромобиль саноати бўйича рўйхатдан ўтказиш кўрсаткичлари 31% га ошди.

Tesla ҳозирда ўзининг энг машҳур модели бўлган Модель Y’нинг янгиланган версиясини чиқариш орқали бозор улушини тиклашга ҳаракат қилмоқда. Март ойининг бошида етказиб бериш бошланган бўлса-да, компания ҳали ҳам катта қийинчиликларга дуч келмоқда. Теслаънинг савдо пасайиши фақат ишлаб чиқариш узилишлари билан эмас, балки Илон Маскнинг сиёсий фаоллиги билан ҳам боғлиқ бўлиши мумкин.

Трампнинг АҚШ президентлигига қайтиши ортидан Маск унинг асосий маслаҳатчиларидан бирига айланди. Бу эса Tesla’нинг бренд имиджига салбий таъсир кўрсатмоқда. Маскнинг танқидчилари АҚШ ва хорижда Tesla дўконлари, қувватлаш станциялари ва мижозларининг автомобилларига ҳужум қилишмоқда. Айниқса, Маск Германия федерал сайловларига аралашмоқчи бўлгач, унинг оммавий рейтинги кескин тушиб кетди. Бундан ташқари, у АҚШнинг НАТОдан чиқиши ва Европанинг мудофааси учун тўловларни тўхтатиш таклифини илгари сурди, бу эса Европадаги мижозлар орасида норозилик уйғотди.

Tesla янги Model Y’ни бозорга чиқариш учун бутун дунё бўйлаб заводларида ишлаб чиқаришни вақтинча тўхтатишга мажбур бўлди. Жумладан, компаниянинг Берлин яқинидаги монтаж фабрикасида ҳам ишлаб чиқариш қисқа муддатга тўхтатилди. Бу эса компанияга ҳафталаб ишлаб чиқариш қувватини бой бериш ва савдоларни кечиктириш каби оқибатларни келтириб чиқарди.

Tesla учун март ойидан кейинги савдо натижалари катта аҳамиятга эга бўлади. Бу компаниянинг сиёсий воқеалардан қандай таъсир кўраётганини ва янги Model Y савдоларни қанчалик тиклашини аниқлашга ёрдам беради.