Telegram’da yangilanish: kanal adminlariga bevosita yozish, HD foto yuborish, ovozli xabarni tahrirlash va boshqalar
Yangi versiya kanallarga bevosita xabar yuborish, ovozli xabarlarni aniq qirqish, guruhlarda mavzularni tezda boshqarish va fotosuratlarni 4 barobar yuqori sifatda yuborish kabi muhim funksiyalarni oʻz ichiga oladi.
Shuningdek, Telegram soʻrovnomalariga 12 tagacha variant qoʻshish imkoniyati ham paydo boʻldi.
Telegram messenjeri navbatdagi yangilanishni eʼlon qildi. Yangi versiya oʻz ichiga bir qator yangi imkoniyatlarni qamrab olgan.
Kanallar adminlariga bevosita xabar yuborish
Endilikda foydalanuvchilar oʻzlari obuna boʻlgan kanallarga bevosita xabar yuborishlari mumkin. Ushbu funksiya orqali kanal egasi yoki administratori bilan shaxsiy muloqot qilish imkoniyati paydo boʻladi. Xabarlar maxsus interfeysda, shaxsiy yozishmalardan alohida holda koʻrsatiladi.
Kanal egasi bu funksiyani faollashtirish uchun "Kanal sozlamalari" boʻlimidagi "Bevosita xabarlar" opsiasini yoqishi kerak. Shuningdek, ular har bir yuborilgan xabar uchun toʻlov belgilashi orqali muloqotni tartibga solish va mantiqiy munosabatni ragʻbatlantirish imkoniyatiga ega boʻladi.
Guruhlarda mavzu boʻyicha tablar
Guruhlarda mavzu bilan ishlash jarayoni ham sezilarli darajada qulaylashdi. Endi mavzular yangi yorliqlar tizimi orqali boshqariladi: foydalanuvchi chap tomonda keng panel yoki yuqoridagi ixcham panel yordamida tezda kerakli mavzuga oʻta oladi. Ushbu funksiyani “Guruh sozlamalari”dan yoqish mumkin.
Ovozli xabarlarni qirqish
Yangilanish bilan ovozli xabarlar uchun qirqish (trim) funksiyasi joriy etildi. Endi foydalanuvchi yozib boʻlgan xabarining boshlanish va yakun nuqtalarini belgilab, ortiqcha qismlarni olib tashlashi mumkin. Bu ayniqsa, uzoq va mukammal xabarlar yozishda foydalidir. Yozuvni qulfga olgan holda boshlash va yakunlangach qirqish menyusidan foydalanish mumkin. Shuningdek, foydalanuvchi yozuvni pauzaga qoʻyib, istalgan vaqtda davom ettirish imkoniga ega.
Fotosuratlarni HD formatda yuborish
Fotosuratlarni joʻnatishda ham sifatni oshirish uchun yangi “Yuqori sifat” opsiasi qoʻshildi. Bu rejim orqali yuborilgan suratlar 4 baravar koʻproq pikselga ega boʻladi, biroq hajmi 0.5 MB dan oshmaydi. Rasm joʻnatishdan oldin tahrirlash oynasidagi SD belgisi bosiladi yoki ilova menyusida “Yuqori sifatda yuborish” varianti tanlanadi. Bu, ayniqsa, sayohat fotosuratlari va selfilar uchun foydalidir.
iOS foydalanuvchilari uchun toʻgʻridan-toʻgʻri media ulashish
iOS foydalanuvchilari uchun yana bir qulaylik shundaki, endi boshqa ilovalardagi medialarni Telegram hikoyasiga toʻgʻridan-toʻgʻri ulashish mumkin. Masalan, “Fotos” ilovasidan topilgan rasm “Ulashish” tugmasi orqali Telegram hikoya muharririda ochiladi.
Kengaytirilgan soʻrovnomalar
Shuningdek, Telegram’dagi soʻrovnoma funksiyasi ham kengaytirildi. Endi har bir soʻrovnoma uchun 12 tagacha javob varianti qoʻshish mumkin. Foydalanuvchilar ushbu soʻrovnomalarni oʻzlarining saqlangan xabarlariga yuborib, keyinchalik undan foydalanish yoki boshqa chatlarga ulashish imkoniyatiga ega boʻladi.
Avvalroq, Telegram’ga yoz mavsumi boshlanishi bilan Ilon Maskga qarashli xAI kompaniyasining Grok sunʼiy intellekti integratsiya qilinishi haqida xabar berilgan edi.
Kelishuv doirasida Telegram 300 million dollar naqd va aksiyalar shaklidagi mablagʻ oldi hamda obuna sotuvlaridan 50 foiz ulushga ega boʻladi.
