“Tayanch Mikromoliya Banki” boshqaruv raisi Zohid Alimov lavozimidan ozod qilindi

“Tayanch Mikromoliya Banki” AJ Kuzatuv kengashi 30 sentabr kuni Zohid Zakirjanovich Alimovni boshqaruv raisi lavozimidan ozod qilish toʻgʻrisida qaror qabul qildi.

Hujjatga koʻra, Alimovning boshqaruv raisi sifatidagi vakolatlari tugatilgan. Bank boshqaruviga vaqtincha rahbarlik qilish esa Shohrux Nozimovich Yusufzodaga yuklatilgan.

Shohrux Yusufzoda bunga qadar bank boshqaruv raisi oʻrinbosari lavozimida ishlab kelayotgan edi.

Zohid Alimov “Tayanch Mikromoliya Banki” boshqaruv raisi etib 28 mart kuni aksiyadorlarning navbatdan tashqari umumiy yigʻilishida saylangan edi. Shu tariqa, uning bank rahbari sifatidagi vakolatlari tayinlanganidan qariyb olti oy oʻtib tugatildi.

Alimov bank sohasida 20 yildan ortiq tajribaga ega. U 2006–2019 yillarda “Kapitalbank” tizimida turli lavozimlarda, jumladan, boshqaruv raisi maslahatchisi, amaliyot boʻlimi boshligʻi va Sergeli filiali boshqaruvchisi sifatida ishlagan. 2020–2022 yillarda esa Anorbank boshqaruvi raisi oʻrinbosari boʻlgan.

2023 yilda Alimov oʻsha yili tashkil etilgan Hayot Bank’ning ilk boshqaruv raisi sifatida faoliyat yuritgan, 2024 yilda esa bank Kuzatuv kengashi aʼzosi boʻlgan.

Bundan tashqari, Alimov mikromoliya sektorida ham oʻz biznesiga ega. U sobiq “Kapitalbank” rahbari Sherzod Karimbayev bilan birgalikda “Olmos Finance” MChJning 50 foizlik ulushiga egalik qiladi. Kompaniya 2026 yil fevralida Markaziy bank tomonidan mikromoliya tashkilotlari reyestriga kiritilgan.

“Tayanch Mikromoliya Banki” Oʻzbekistondagi birinchi mikromoliya banki hisoblanadi. Markaziy bank 2025 yil 24 oktabrda “Tayyab Finance Mikromoliya Tashkiloti” AJga mikromoliya banki faoliyatini amalga oshirish uchun litsenziya bergan va tashkilot “TAYANCH” mikromoliya bankiga aylantirilgan edi.