Soliq siyosati: 2025 yilda asosiy soliq stavkalari oʻzgarishsiz qoldirilmoqda

29 oktabr kuni Soliq qoʻmitasi hamda Iqtisodiyot va moliya vazirligi rahbariyati ishtirokida “2025 yildagi asosiy makroiqtisodiy koʻrsatkichlar va davlat byudjeti parametrlari” mavzusida matbuot anjumani boʻlib oʻtdi. 

Maʼlum qilinishicha, 2025 yilda asosiy soliq stavkalari oʻzgarishsiz qoldirilmoqda.

• foyda soligʻi — 15%;
• qoʻshilgan qiymat soligʻi — 12%;
• jismoniy shaxslardan olinadigan daromad soligʻi — 12%;
• yuridik shaxslar uchun mol-mulk soligʻi — 1,5%;
• aylanmadan olinadigan soliq — 4%;
• qishloq xoʻjaligiga moʻljallangan yerlar uchun yer soligʻi — 0,95%;
• qishloq xoʻjaligi yerlarini sugʻorish uchun suv soligʻi — 100 soʻm.

Sogʻlom turmush tarzini yaxshilash va tabiat resurslarini asrash:

• alkogol va tamaki mahsulotlari uchun aksiz soligʻi stavkalarini JST talablariga bosqichma-bosqich muvofiqlashtirilmoqda;
• barcha shirin ichimliklarga aksiz soligʻi joriy etilmoqda (amalda gazlangan shirin ichimliklarda);
• suvni isrof qilishni kamaytirish maqsadida avtomobillarni yuvishda foydalaniladigan suv uchun soliq stavkasi qayta koʻrib chiqilmoqda (1 kub metr uchun 15 ming soʻm).

Tadbirkorlarga teng sharoitlar yaratish:

• JST talablariga asosan tovar va xizmatlar eksporti boʻyicha foyda soligʻi imtiyozi bekor qilinmoqda;
• iqtisodiyotning barcha tarmoqlari (sanoat, xizmatlar, qurilish va boshqalar) uchun suv soligʻi bir xil belgilanmoqda.