“Poytaxt Bank” rahbariyatida oʻzgarish yuz berdi

28 avgust kuni “Poytaxt Bank” Kuzatuv kengashi qaroriga binoan Abror Turgʻunov bank Boshqaruvi raisi vazifasini vaqtincha bajaruvchi etib tayinlandi. Bu haqda Korporativ axborot yagona portalida xabar qilindi.

Turgʻunov 2024 yil iyunidan buyon bank raisi oʻrinbosari vazifasini bajarib kelayotgan edi. U chakana kreditlash, gʻaznachilik, iqtisodiy tahlil va strategik rivojlanish, tashqi iqtisodiy faoliyat, umumiy boʻlim hamda xaridlar boʻlimiga masʼul boʻlgan.

Abror Turgʻunov 1983 yilda Toshkentda tugʻilgan. 2005 yilda Toshkent davlat iqtisodiyot universitetini, 2013 yilda esa Bank-moliya akademiyasini tamomlagan.

2025 yil mart oyida bank Boshqaruvi raisi birinchi oʻrinbosari lavozimida ishlagan Doʻstboy Abjalov vaqtincha rahbar etib tayinlangandi. Hozirda esa bankning rasmiy saytida uning nomi mansabdor shaxs sifatida koʻrsatilmagan.

Maʼlumot uchun, 2024 yil iyun oyida “Poytaxt Bank” BAAning “Bond Investments Limited LLC” kompaniyasiga 10 million dollarga sotilgan. 

Avvalroq Pinkod bank ustav kapitali 500 mlrd soʻmga yetkazilishi haqida xabar bergan edi. Qarorga koʻra, umumiy qiymati 400 mlrd soʻmlik oddiy aksiyalar bankning yagona aksiyadori — “Bond Investments Limited LLC” kompaniyasiga yopiq obuna shaklida joylashtiriladi.