Oʻzbekistonda oltin narxi bir yil ichida qariyb 75 foizga oshdi

Oʻzbekistonda oltin quymalari narxi ketma-ket yettinchi kun rekord darajani qayd etdi. 28 yanvar holatiga koʻra, bir gramm oltin narxi 1 foizga oshib, 2 058 250 soʻmni tashkil qildi.

5 grammli oltin quymasi esa bir kun ichida yana 104 ming soʻmga qimmatlab, deyarli 10,3 million soʻmdan sotilmoqda. Ikki kun avval mazkur quymaning narxi ilk bor psixologik muhim boʻlgan 10 million soʻm chegarasidan oshgan edi. 

Oltin quymalarning sotish va qaytarib sotib olish narxlari quyidagicha:

Maʼlumotlarga koʻra, Yanvar oyidan beri oltin narxi 18,85 foizga koʻtarilgan. Soʻnggi bir yil davomida esa qimmatbaho metallning qiymati 74,7 foizga oshgan.

Jahon bozorida oltin narxi

Jahon bozorlarida ham oltin narxi oʻsishda davom etmoqda. Soʻnggi sutka ichida oltin kotirovkalari 1,5 foizga oshib, yangi tarixiy rekordni yangiladi. Savdolar davomida bir troya unsiya oltin 5 267 dollargacha koʻtarildi. Bu bir gramm toza oltin 169 dollardan oshganini bildiradi.

Xabar tayyorlanayotgan paytda qimmatbaho metallning bir unsiyasi 5 259 dollar atrofida savdo qilinmoqda.

Tahlilchilarga koʻra, oltin narxining keskin koʻtarilishiga markaziy banklarning AQSh dollariga bogʻliqlikni kamaytirish maqsadida oltin zaxiralarini faol xarid qilayotgani, global geosiyosiy noaniqliklar hamda dollar kursining zaiflashuvi asosiy omil boʻlmoqda. Bu holat oltinni boshqa valyutalar egalariga yanada jozibador qilmoqda.

Yirik moliyaviy institutlar oltin bozoridagi “bull run” davom etishini kutmoqda. Xususan, Deutsche Bank va Bank of America tahlilchilariga koʻra, agar hozirgi sharoitlar saqlanib qolsa, 2026 yil oxiriga kelib oltin narxi bir unsiya uchun 6 ming dollargacha yetishi mumkin.

Shu bilan birga, kumush narxi ham tarixiy maksimal darajaga chiqdi. 2026 yil 28 yanvar holatiga koʻra, kumush bir unsiyasi 115 dollar atrofida savdo qilinmoqda. Kun davomida narx hatto 117,75 dollargacha yetib, 100 dollarlik chegarani qatʼiy ortda qoldirdi.