Oʻzbekistonda ketma-ket ikkinchi oy mavsumiy deflyatsiya kuzatilmoqda
Iyul oyida isteʼmol narxlari oʻrtacha 0,2 foizga pasaydi. Narxlarning pasayishiga asosan oziq-ovqat mahsulotlari, xususan meva, sabzavot va sut mahsulotlarining arzonlashuvi sabab boʻldi.
Yillik inflyatsiya esa avvalgi oylariga nisbatan biroz tezlashib, 8,9 foizni tashkil etdi.
Oʻzbekistonda ketma-ket ikkinchi oy ham mavsumiy deflyatsiya kuzatilmoqda. Milliy statistika qoʻmitasi hisobotiga koʻra, iyul oyida isteʼmol narxlari oʻrtacha 0,2 foizga pasaygan.
Yil boshidan buyon (yetti oyda) isteʼmol narxlari 4 foizga oshgan boʻlib, bu oʻrtacha oylik 0,6 foizlik koʻrsatkichni tashkil qiladi. Bu raqam 2024 yilning shu davridagi koʻrsatkichlarga nisbatan biroz past (oʻtgan yili — 4,9% va 0,7%).
Yillik inflyatsiya esa may-iyun oylariga nisbatan biroz tezlashib, 8,9 foizni tashkil etdi. Ammo bu hali ham oʻtgan yilgi 10,5 foizlik koʻrsatkichdan past.
Hududlar kesimida Qoraqalpogʻiston Respublikasi, Xorazm va Andijon viloyatlarida eng katta deflyatsiya kuzatilgan — 0,4 foiz. Aksincha, Sirdaryo viloyatida iyul oyida narxlar 0,7 foizga oshgan. Eng yuqori yillik inflyatsiya esa Fargʻona (9,9%) va Sirdaryo viloyatlarida (9,5%) qayd etilgan.
Oʻtgan oyda oziq-ovqat mahsulotlari narxi 1 foizga tushgan boʻlib, bu umumiy inflyatsiyaning kamayishiga asosiy sabab boʻldi. Meva va yongʻoqlar narxi 9 foizdan koʻproqqa, sabzavotlar, ildizmevalar va dukkakli mahsulotlar esa 4,8 foizga arzonlashgan.
Bundan tashqari, sut mahsulotlari va tuxum narxi 0,8 foizga, don mahsulotlari esa 0,1 foizga pasaygan. Shu bilan birga, iyul oyida goʻsht narxi deyarli 2 foizga oshgan.
Yillik koʻrsatkichlarga koʻra, oziq-ovqat narxlarining oʻsishi sezilarli darajada tezlashgan. 2024 yil iyul oyida ular soʻnggi 12 oyda atigi 2,9 foizga oshgan boʻlsa, hozir bu koʻrsatkich 6,5 foizga yetgan.
Nooziq-ovqat mahsulotlari va xizmatlar segmenti
Nooziq-ovqat mahsulotlarida inflyatsiya darajasi nisbatan past boʻlib, oy davomida 0,2 foizni, yillik hisobda esa 7,1 foizni tashkil etdi. Kiyim-kechak, poyabzal va maishiy texnika narxlari oy davomida atigi 0,1 foizga oshgan (yillik koʻrsatkichlar mos ravishda 4,4% va 4,9%).
Xizmatlar sohasi esa inflyatsiyaning asosiy harakatlantiruvchi kuchi boʻlib qolmoqda. Iyul oyida xizmatlar narxi oʻrtacha 0,9 foizga, yillik hisobda esa 16,3 foizga oshgan. Bu asosan kommunal xizmatlar narxining oshishiga bogʻliq boʻlib, mamlakat boʻylab ular oʻrtacha 7,5 foizga qimmatlashgan.
Toʻrt viloyatda ichimlik suvi tariflari oshgan, Navoiy va Samarqandda chiqindi olib chiqish xizmatlari narxi koʻtarilgan. Jizzax, Qashqadaryo va Fargʻonada esa koʻp qavatli uylarni boshqarish uchun olinadigan toʻlovlar oshgan.
