Ўзбекистонда кетма-кет иккинчи ой мавсумий дефляция кузатилмоқда
Июль ойида истеъмол нархлари ўртача 0,2 фоизга пасайди. Нархларнинг пасайишига асосан озиқ-овқат маҳсулотлари, хусусан мева, сабзавот ва сут маҳсулотларининг арзонлашуви сабаб бўлди.
Йиллик инфляция эса аввалги ойларига нисбатан бироз тезлашиб, 8,9 фоизни ташкил этди.
Ўзбекистонда кетма-кет иккинчи ой ҳам мавсумий дефляция кузатилмоқда. Миллий статистика қўмитаси ҳисоботига кўра, июль ойида истеъмол нархлари ўртача 0,2 фоизга пасайган.
Йил бошидан буён (етти ойда) истеъмол нархлари 4 фоизга ошган бўлиб, бу ўртача ойлик 0,6 фоизлик кўрсаткични ташкил қилади. Бу рақам 2024 йилнинг шу давридаги кўрсаткичларга нисбатан бироз паст (ўтган йили — 4,9% ва 0,7%).
Йиллик инфляция эса май-июнь ойларига нисбатан бироз тезлашиб, 8,9 фоизни ташкил этди. Аммо бу ҳали ҳам ўтган йилги 10,5 фоизлик кўрсаткичдан паст.
Ҳудудлар кесимида Қорақалпоғистон Республикаси, Хоразм ва Андижон вилоятларида энг катта дефляция кузатилган — 0,4 фоиз. Аксинча, Сирдарё вилоятида июль ойида нархлар 0,7 фоизга ошган. Энг юқори йиллик инфляция эса Фарғона (9,9%) ва Сирдарё вилоятларида (9,5%) қайд этилган.
Ўтган ойда озиқ-овқат маҳсулотлари нархи 1 фоизга тушган бўлиб, бу умумий инфляциянинг камайишига асосий сабаб бўлди. Мева ва ёнғоқлар нархи 9 фоиздан кўпроққа, сабзавотлар, илдизмевалар ва дуккакли маҳсулотлар эса 4,8 фоизга арзонлашган.
Бундан ташқари, сут маҳсулотлари ва тухум нархи 0,8 фоизга, дон маҳсулотлари эса 0,1 фоизга пасайган. Шу билан бирга, июль ойида гўшт нархи деярли 2 фоизга ошган.
Йиллик кўрсаткичларга кўра, озиқ-овқат нархларининг ўсиши сезиларли даражада тезлашган. 2024 йил июль ойида улар сўнгги 12 ойда атиги 2,9 фоизга ошган бўлса, ҳозир бу кўрсаткич 6,5 фоизга етган.
Ноозиқ-овқат маҳсулотлари ва хизматлар сегменти
Ноозиқ-овқат маҳсулотларида инфляция даражаси нисбатан паст бўлиб, ой давомида 0,2 фоизни, йиллик ҳисобда эса 7,1 фоизни ташкил этди. Кийим-кечак, пойабзал ва маиший техника нархлари ой давомида атиги 0,1 фоизга ошган (йиллик кўрсаткичлар мос равишда 4,4% ва 4,9%).
Хизматлар соҳаси эса инфляциянинг асосий ҳаракатлантирувчи кучи бўлиб қолмоқда. Июль ойида хизматлар нархи ўртача 0,9 фоизга, йиллик ҳисобда эса 16,3 фоизга ошган. Бу асосан коммунал хизматлар нархининг ошишига боғлиқ бўлиб, мамлакат бўйлаб улар ўртача 7,5 фоизга қимматлашган.
Тўрт вилоятда ичимлик суви тарифлари ошган, Навоий ва Самарқандда чиқинди олиб чиқиш хизматлари нархи кўтарилган. Жиззах, Қашқадарё ва Фарғонада эса кўп қаватли уйларни бошқариш учун олинадиган тўловлар ошган.
