Oʻzbekiston xalqaro zaxiralari bir oyda 6,8 mlrd dollarga kamaydi
Oʻzbekistonning rasmiy xalqaro zaxiralari iyun oyida 6,8 mlrd dollarga kamayib, 1 iyul holatiga 63,76 mlrd dollarni tashkil etdi. Pasayishning asosiy qismi oltin qiymatining tushishi hisobiga yuz berdi, biroq oltinning fizik hajmi oshishda davom etgan.
Markaziy bank maʼlumotlariga koʻra, 2026 yil 1 iyul holatiga Oʻzbekistonning rasmiy xalqaro zaxiralari 63,76 mlrd dollarni tashkil qildi. Bu 1 iyundagi 70,58 mlrd dollarga nisbatan 6,83 mlrd dollarga yoki 9,7 foizga kam.
Zaxiralarning pasayishida asosiy omil oltin qiymatining kamayishi boʻldi. Markaziy bank izohiga koʻra, iyun oyida oltin narxining bir troy unsiya uchun 4516,85 dollardan 4016,70 dollargacha tushishi zaxiralarga 6,9 mlrd dollarlik salbiy taʼsir koʻrsatgan.
Natijada zaxiralar tarkibidagi oltinning qiymati bir oyda 61,44 mlrd dollardan 55,76 mlrd dollargacha kamaydi. Shu bilan birga, oltinning fizik hajmi aksincha oshgan — 13,6 mln troy unsiyadan 13,88 mln troy unsiyagacha. Bu taxminan 431,7 tonna oltin degani.
| Koʻrsatkichlar | 1 yanvar 2026 | 1 may 2026 | 1 iyun 2026 | 1 iyul 2026 |
|---|---|---|---|---|
| Rasmiy zaxira aktivlari | $66,31 mlrd | $70,89 mlrd | $70,58 mlrd | $63,76 mlrd |
| Oltin | $55,09 mlrd | $61,59 mlrd | $61,44 mlrd | $55,76 mlrd |
| Sof hajmi | 12,55 mln troy unsiya | 13,32 mln troy unsiya | 13,6 mln troy unsiya | 13,88 mln troy unsiya |
| Xorijiy valyutadagi zaxira aktivlari | $10,64 mlrd | $8,72 mlrd | $8,57 mlrd | $7,44 mlrd |
| Shu jumladan qimmatli qogʻozlar | $1,53 mlrd | $1,55 mlrd | $1,55 mlrd | $2,85 mlrd |
Xorijiy valyutadagi zaxira aktivlari ham qisqargan. Ularning hajmi 1 iyundagi 8,57 mlrd dollardan 1 iyulda 7,44 mlrd dollargacha kamaydi. Bunda naqd valyuta va depozitlar 5,72 mlrd dollardan 4,58 mlrd dollargacha tushgan.
2026 yil boshidan beri xalqaro zaxiralar 66,31 mlrd dollardan 63,76 mlrd dollargacha kamaydi. Yaʼni yarim yil yakunida pasayish 2,55 mlrd dollarni tashkil qilmoqda.
1 iyul holatiga zaxiralarning qariyb 87,5 foizi oltin hissasiga toʻgʻri kelmoqda. Shu sababli jahon bozorida oltin narxining oʻzgarishi Oʻzbekiston xalqaro zaxiralarining umumiy qiymatiga sezilarli taʼsir koʻrsatmoqda.
