Oʻzbekiston iqtisodiyoti 2025 yilning birinchi yarmida 7,2 foizga oʻsdi, aholi daromadlari oʻsishi esa sekinlashdi
Yilning dastlabki olti oyida Oʻzbekiston iqtisodiyoti 7,2 foizga oʻsdi. Inflyatsiya 4,2 foizgacha pasaydi, eksport hajmi esa oltin va xizmatlar hisobiga 29,2 foizga oshdi. Biroq aholi real daromadlari oʻsishi 9,5 foizgacha sekinlashdi.
2025 yilning yanvar–iyun oylarida Oʻzbekiston yalpi ichki mahsuloti (YaIM) 7,2 foizga oshdi. Bu koʻrsatkich oʻtgan yilning shu davriga nisbatan (6,6%) 0,6 foiz punktga yuqori. Bu haqda Milliy statistika qoʻmitasi maʼlumotlarida keltirilgan.
Ayni vaqtda inflyatsiya darajasi pasayishda davom etmoqda — 2024 yil birinchi yarmidagi 5,2 foiz koʻrsatkichdan 4,2 foizgacha sekinlashdi. Aholining real umumiy daromadlari oʻsishi esa 11,9 foizdan 9,5 foizgacha pasaydi.
Sanoat ishlab chiqarishining fizik hajmi indeksida ham biroz pasayish kuzatildi — oʻsish surʼati 7,8 foizdan 6,6 foizgacha kamaydi.
Qurilish sohasi esa oʻsishni davom ettirdi — bu sohadagi hajm yil boshidan buyon 10,7 foizga oshdi (2024 yilning mos davrida — 10,1%).
Ijobiy dinamikalar boshqa sohalarda ham qayd etildi:
- chakana savdo aylanmasi 9,7 foizga,
- xizmatlar sohasi 13,3 foizga,
- yoʻlovchi tashish hajmi 6 foizga,
- qishloq, oʻrmon va baliq xoʻjaligi 4 foizga oʻsdi.
Biroq yuk tashish hajmi oʻsish surʼatlarining sekinlashishi bilan ajralib turdi — 2024 yilning birinchi yarmidagi 4 foiz koʻrsatkichga nisbatan bu yil 1,8 foizni tashkil etdi.
