Oʻzbekiston bozorida oltin narxi yil boshidan beri 37-marta rekord oʻrnatdi
7 sentabr holatiga koʻra, Markaziy bank belgilagan bir gramm oltin narxi 1 mln 577 ming soʻmni tashkil etdi. Bu ketma-ket beshinchi kun qayd etilgan rekorddir. Jahon bozorida esa oltinning spot narxi bir unsiya uchun $3 978 gacha koʻtarildi
Oʻzbekiston va jahon bozorida oltin narxlarining izchil oʻsishi kuzatilmoqda. 7 sentabr kuni Markaziy bank tomonidan muomalaga chiqarilgan oltin quymasining bir gramm narxi 1 mln 577 ming soʻmni tashkil etdi.
Bu ketma-ket beshinchi kun davomida oltin narxining yangi rekord darajaga koʻtarilishi hisoblanadi.
Mahalliy bozorda 2025 yil boshidan buyon oltin narxlari 37-marta rekord darajaga chiqqan. Shu davr mobaynida narxlar 39,3 % ga oshgan boʻlsa, oʻtgan yilning shu kuniga nisbatan oʻsish 40,7 % ni tashkil etdi.
Jahon bozorida esa oltinning spot narxi bir unsiya uchun $3 978 gacha koʻtarildi, bu esa bir gramm uchun $128 ga teng.
Shveysariyaning yirik moliyaviy instituti UBS banki 2025 yil oxiri uchun oltin narxi prognozini avvalgi $3 800 dan $4 200 gacha oshirdi.
