Oltindan tezroq oʻsmoqda: kumush narxi tarixda ilk bor 60 dollardan oshdi

Kumush narxi tarixda ilk marotaba 60 dollardan oshib rekord oʻrnatdi. Bu haqda Forbes xabar berdi. 

Yil davomida kumush global taʼminot tanqisligi va Federal Rezervning kutilayotgan foiz stavkalarini pasaytirishi fonida oltindan ham tezroq oʻsmoqda.

Nyu-York Tovar birjasida spot kumush oxirgi bir kun ichida qariyb 4% ga oshib, troya unsiyasi uchun 60,82 dollar atrofida savdo qilindi.  Kumush fyucherslari ham 4% dan koʻproqqa sakrab, qariyb 61 dollarga yetdi, kun davomida esa 61,06 dollarlik eng yuqori koʻrsatkich qayd etildi.

Kumush narxlarining soʻnggi oʻsishi treyderlarning Federal Rezerv tomonidan foiz stavkalarini yana tushirish ehtimoli yuqori ekanligi tufayli yuz bermoqda. Foiz stavkalarining pasayishi va dollarning zaiflashuvi odatda qimmatbaho metallar narxining koʻtarilishiga olib keladi.

AQSh dollar indeksi bu yil 8,5% ga, oxirgi bir oyda esa 0,5% ga kamaydi.

Kumush noyabr oyida AQSh Geologiya xizmati tomonidan “muhim mineral”lar roʻyxatiga kiritildi. Bu uning AQSh iqtisodiyoti uchun juda muhim ekani va global taʼminot zanjirlaridagi uzilishlar tufayli xavf ostida qolayotganini anglatadi. Xabarlarga koʻra, bu investorlar uchun kumushga tariflar qoʻllanishi mumkinligini bildiradi, chunki global zaxiralar qisqarib bormoqda.

Katta raqam

Spot kumush narxi yil boshidan buyon qariyb 109% ga oshdi. Bu koʻrsatkich oltinning oʻsish surʼatidan ham yuqori. Oltin yil boshidan beri 60 foizga oʻsgan. Spot platina ham oltindan tezroq oʻsib, yil davomida 86% ga koʻtarildi. Bu asosan elektromobillarga talabning oshishi va global taʼminot qisqarishi bilan bogʻliq.

Kumush narxlarining rekord darajada oshganiga qaramay, Uoll-strit mutaxassislari oltin hanuz eng xavfsiz investitsiya ekanini taʼkidlamoqda. Goldman Sachs oktabr oyida eʼlon qilgan tahlilida kumush bozori “yuqori volatillik va pasayish xavfini” saqlab qolayotganini, oltin esa markaziy banklar tomonidan kuchli talabga ega boʻlgani va tabiatan kamyob resurs boʻlgani uchun yanada barqaror investitsiya hisoblanishini yozgan.