Олтиндан тезроқ ўсмоқда: кумуш нархи тарихда илк бор 60 доллардан ошди

Кумуш нархи тарихда илк маротаба 60 доллардан ошиб рекорд ўрнатди. Бу ҳақда Forbes хабар берди. 

Йил давомида кумуш глобал таъминот танқислиги ва Федерал Резервнинг кутилаётган фоиз ставкаларини пасайтириши фонида олтиндан ҳам тезроқ ўсмоқда.

Ню-Ёрк Товар биржасида спот кумуш охирги бир кун ичида қарийб 4% га ошиб, троя унцияси учун 60,82 доллар атрофида савдо қилинди.  Кумуш фьючерслари ҳам 4% дан кўпроққа сакраб, қарийб 61 долларга етди, кун давомида эса 61,06 долларлик энг юқори кўрсаткич қайд этилди.

Кумуш нархларининг сўнгги ўсиши трейдерларнинг Федерал Резерв томонидан фоиз ставкаларини яна тушириш эҳтимоли юқори эканлиги туфайли юз бермоқда. Фоиз ставкаларининг пасайиши ва долларнинг заифлашуви одатда қимматбаҳо металлар нархининг кўтарилишига олиб келади.

АҚШ доллар индекси бу йил 8,5% га, охирги бир ойда эса 0,5% га камайди.

Кумуш ноябрь ойида АҚШ Геология хизмати томонидан “муҳим минерал”лар рўйхатига киритилди. Бу унинг АҚШ иқтисодиёти учун жуда муҳим экани ва глобал таъминот занжирларидаги узилишлар туфайли хавф остида қолаётганини англатади. Хабарларга кўра, бу инвесторлар учун кумушга тарифлар қўлланиши мумкинлигини билдиради, чунки глобал захиралар қисқариб бормоқда.

Катта рақам

Spot кумуш нархи йил бошидан буён қарийб 109% га ошди. Бу кўрсаткич олтиннинг ўсиш суръатидан ҳам юқори. Олтин йил бошидан бери 60 фоизга ўсган. Spot платина ҳам олтиндан тезроқ ўсиб, йил давомида 86% га кўтарилди. Бу асосан электромобилларга талабнинг ошиши ва глобал таъминот қисқариши билан боғлиқ.

Кумуш нархларининг рекорд даражада ошганига қарамай, Уолл-стрит мутахассислари олтин ҳануз энг хавфсиз инвестиция эканини таъкидламоқда. Goldman Sachs октябрь ойида эълон қилган таҳлилида кумуш бозори “юқори волатиллик ва пасайиш хавфини” сақлаб қолаётганини, олтин эса марказий банклар томонидан кучли талабга эга бўлгани ва табиатан камёб ресурс бўлгани учун янада барқарор инвестиция ҳисобланишини ёзган.