Markaziy bank iqtidorli talabalar uchun maxsus stipendiya dasturini eʼlon qildi
Tanlovda iqtisodiyot, moliya, bank ishi, amaliy matematika va axborot texnologiyalari yoʻnalishida soʻnggi bosqichda tahsil olayotgan talabalar ishtirok etishi mumkin.
Gʻoliblarga bazaviy hisoblash miqdorining kamida uch baravari miqdorida stipendiya hamda Markaziy bank boʻlinmalarida amaliyot oʻtash imkoniyati beriladi.
Oʻzbekiston Respublikasi Markaziy banki iqtidorli va tashabbuskor yoshlarni ragʻbatlantirish maqsadida yangi stipendiya dasturini eʼlon qildi.
Ushbu tashabbus bank ishi, moliya, iqtisodiyot hamda axborot texnologiyalari sohalarida tahsil olayotgan talabalarning bilim va koʻnikmalarini yanada rivojlantirish, ularni amaliyot bilan uygʻunlashtirishni maqsad qiladi.
Ishtirokchilar doirasi
Mazkur dastur har yili tashkil etilib, unda yetakchi oliy taʼlim muassasalarining bakalavriat va magistratura bosqichining soʻnggi kursida, kunduzgi taʼlim shaklida oʻqiyotgan talabalar qatnashishi mumkin. Stipendiya tanlovida quyidagi taʼlim muassasalari talabalari ishtirok etish huquqiga ega:
- Jahon iqtisodiyoti va diplomatiya universiteti;
- Toshkent davlat iqtisodiyot universiteti;
- Mirzo Ulugʻbek nomidagi Oʻzbekiston Milliy universiteti;
- Muhammad Al-Xorazmiy nomidagi Toshkent axborot texnologiyalari universiteti;
- Toshkentdagi INHA universiteti;
- Toshkentdagi Xalqaro Vestminster universiteti;
- Toshkentdagi Singapur menejmentni rivojlantirish instituti;
- MGIMO (Moskva davlat xalqaro munosabatlar instituti) Toshkent filiali;
- M.V. Lomonosov nomidagi Moskva davlat universiteti Toshkent filiali;
- Shuningdek, viloyatlarda bank ishi, iqtisodiyot, moliya va axborot texnologiyalari yoʻnalishlari mavjud taʼlim muassasalari.
Stipendiya shartlari va imkoniyatlari
Markaziy bank stipendiyasi miqdori Oʻzbekiston Respublikasida belgilangan bazaviy hisoblash miqdorining kamida uch baravari qilib belgilangan. Stipendiatlar tanlov asosida saralab olinadi.
Tanlov gʻoliblari Markaziy bankning tegishli boʻlinmalarida haftasiga 15 soatdan oshmagan vaqt davomida amaliyot oʻtash imkoniyatiga ega boʻladilar. Bu jarayon ularga nafaqat nazariy bilimlarini boyitish, balki bank tizimining amaliy faoliyati bilan yaqindan tanishish imkonini ham beradi.
Talabgorlar uchun asosiy talablar
- Oʻquv yilining yakuniga koʻra yuqori reyting koʻrsatkichiga ega boʻlishi;
- Davlat tilini mukammal bilishi;
- Rus va ingliz tillarini kamida B2 darajasida bilishi.
Ustunlik beriladigan mezonlar
- ACCA yoki boshqa xalqaro darajadagi moliyaviy sertifikatlarga ega boʻlish;
- Big Data (katta maʼlumotlar) bilan ishlash koʻnikmalariga ega boʻlish;
- IELTS sertifikatida 7.0 va undan yuqori ball koʻrsatkichiga erishish;
- Iqtisodiyot, moliya yoki axborot texnologiyalari yoʻnalishida xalqaro yoki respublika miqyosidagi olimpiadalarda gʻolib yoki sovrindor boʻlish.
Tanlovning oʻtkazilish tartibi
Test sinovlari masofaviy shaklda 15-sentabr kuni soat 10:00 da oʻtkaziladi. Bunda savollar quyidagicha tuziladi:
- Iqtisodiyot, bank ishi, moliya va amaliy matematika yoʻnalishlari uchun: makroiqtisodiyot va mantiqiy fikrlashga oid savollar;
- Axborot texnologiyalari yoʻnalishlari uchun: sohaga oid bilim va mantiqiy fikrlash savollari.
Test sinovlarida qatnashish uchun @cbu_stipendiya_bot manzilida roʻyxatdan oʻtish kerak.
