Марказий банк иқтидорли талабалар учун махсус стипендия дастурини эълон қилди
Танловда иқтисодиёт, молия, банк иши, амалий математика ва ахборот технологиялари йўналишида сўнгги босқичда таҳсил олаётган талабалар иштирок этиши мумкин.
Ғолибларга базавий ҳисоблаш миқдорининг камида уч баравари миқдорида стипендия ҳамда Марказий банк бўлинмаларида амалиёт ўташ имконияти берилади.
Ўзбекистон Республикаси Марказий банки иқтидорли ва ташаббускор ёшларни рағбатлантириш мақсадида янги стипендия дастурини эълон қилди.
Ушбу ташаббус банк иши, молия, иқтисодиёт ҳамда ахборот технологиялари соҳаларида таҳсил олаётган талабаларнинг билим ва кўникмаларини янада ривожлантириш, уларни амалиёт билан уйғунлаштиришни мақсад қилади.
Иштирокчилар доираси
Мазкур дастур ҳар йили ташкил этилиб, унда етакчи олий таълим муассасаларининг бакалавриат ва магистратура босқичининг сўнгги курсида, кундузги таълим шаклида ўқиётган талабалар қатнашиши мумкин. Стипендия танловида қуйидаги таълим муассасалари талабалари иштирок этиш ҳуқуқига эга:
- Жаҳон иқтисодиёти ва дипломатия университети;
- Тошкент давлат иқтисодиёт университети;
- Мирзо Улуғбек номидаги Ўзбекистон Миллий университети;
- Муҳаммад Ал-Хоразмий номидаги Тошкент ахборот технологиялари университети;
- Тошкентдаги ИНҲА университети;
- Тошкентдаги Халқаро Вестминстер университети;
- Тошкентдаги Сингапур менежментни ривожлантириш институти;
- МГИМО (Москва давлат халқаро муносабатлар институти) Тошкент филиали;
- М.В. Ломоносов номидаги Москва давлат университети Тошкент филиали;
- Шунингдек, вилоятларда банк иши, иқтисодиёт, молия ва ахборот технологиялари йўналишлари мавжуд таълим муассасалари.
Стипендия шартлари ва имкониятлари
Марказий банк стипендияси миқдори Ўзбекистон Республикасида белгиланган базавий ҳисоблаш миқдорининг камида уч баравари қилиб белгиланган. Стипендиатлар танлов асосида саралаб олинади.
Танлов ғолиблари Марказий банкнинг тегишли бўлинмаларида ҳафтасига 15 соатдан ошмаган вақт давомида амалиёт ўташ имкониятига эга бўладилар. Бу жараён уларга нафақат назарий билимларини бойитиш, балки банк тизимининг амалий фаолияти билан яқиндан танишиш имконини ҳам беради.
Талабгорлар учун асосий талаблар
- Ўқув йилининг якунига кўра юқори рейтинг кўрсаткичига эга бўлиши;
- Давлат тилини мукаммал билиши;
- Рус ва инглиз тилларини камида B2 даражасида билиши.
Устунлик бериладиган мезонлар
- ACCA ёки бошқа халқаро даражадаги молиявий сертификатларга эга бўлиш;
- Big Data (катта маълумотлар) билан ишлаш кўникмаларига эга бўлиш;
- IELTS сертификатида 7.0 ва ундан юқори балл кўрсаткичига эришиш;
- Иқтисодиёт, молия ёки ахборот технологиялари йўналишида халқаро ёки республика миқёсидаги олимпиадаларда ғолиб ёки совриндор бўлиш.
Танловнинг ўтказилиш тартиби
Тест синовлари масофавий шаклда 15-сентабр куни соат 10:00 да ўтказилади. Бунда саволлар қуйидагича тузилади:
- Иқтисодиёт, банк иши, молия ва амалий математика йўналишлари учун: макроиқтисодиёт ва мантиқий фикрлашга оид саволлар;
- Ахборот технологиялари йўналишлари учун: соҳага оид билим ва мантиқий фикрлаш саволлари.
Тест синовларида қатнашиш учун @cbu_stipendiya_bot манзилида рўйхатдан ўтиш керак.
