Markaziy bank endilikda jarimaga tortilgan bank rahbarlarining ism-sharifini ochiqlashi mumkin

Markaziy bank banklar, shuningdek, nobank moliya tashkilotlariga nisbatan sanksiyalar va boshqa choralarni qoʻllash tartibiga oʻzgartirishlar kiritdi. Tegishli buyruq 2-may kuni Adliya vazirligi tomonidan davlat roʻyxatidan oʻtkazildi.

Oʻzgarishlarga koʻra, nizomning amal qilish doirasi soʻnggi yillarda Oʻzbekiston qonunchiligida paydo boʻlgan yangi turdagi moliya institutlariga ham tatbiq etiladi. Xususan, mikromoliya banklari, faktoring va kafillik tashkilotlari hamda kredit byurolari ham ushbu tartib doirasiga kiritilmoqda.

Sanksiyalarni qoʻllash tartibi ham qayta koʻrib chiqildi. Endilikda huquqbuzarliklar uchun jarima miqdorini belgilashda moliya tashkilotining moliyaviy holati va faoliyat koʻlami inobatga olinadi.

Shuningdek, sanksiyalar va boshqa choralarni qoʻllash bilan bogʻliq ayrim protsessual muddatlar uzaytirilmoqda. Jumladan, Markaziy bank tegishli qarordan koʻchirmani moliya tashkilotiga yoki uning rahbariga 7 ish kuni ichida yuborishi mumkin boʻladi. Amaldagi tartibda bu muddat 3 ish kunini tashkil etadi.

Agar tashkilot qaror ustidan Apellyatsiya kengashiga shikoyat qilsa, kengash shikoyatni 15 kun ichida koʻrib chiqishi lozim. Biroq batafsil oʻrganish va tekshirish zarur boʻlganda yoki qoʻshimcha hujjatlar soʻralganda ushbu muddatni 1 oygacha uzaytirishga ruxsat beriladi.

Markaziy bank tomonidan berilishi mumkin boʻlgan koʻrsatmalar roʻyxati ham kengaytirildi. Endilikda regulyator moliyaviy xizmatlar isteʼmolchilarining huquqlarini tiklash boʻyicha choralar koʻrishni talab qilishi mumkin. Jumladan, moliya tashkilotiga qayta hisob-kitob qilish, ortiqcha yoki asossiz undirilgan mablagʻlarni mijozlarga qaytarish majburiyati yuklatilishi mumkin.

Bundan tashqari, Markaziy bank ayrim hollarda banklar va boshqa moliya tashkilotlarining ayrim operatsiyalarini cheklash huquqiga ega boʻladi. Bunday choralar, xususan, bank ustav kapitalining eng kam miqdoriga doir talablar bajarilmaganda yoki kiberxavfsizlik tahdidlarining, jumladan, bank kartalaridan mablagʻ oʻgʻirlanishining oldini olish va bartaraf etish boʻyicha talablar buzilganda qoʻllanilishi mumkin.

Hujjatda Markaziy bank bank rahbariyatini jarimaga tortishi mumkin boʻlgan qoidabuzarliklar roʻyxati ham aniqlashtirilgan. Ular qatoriga bank faoliyatini qonunchilikka muvofiq tashkil etmaslik, tavakkalchiliklarni boshqarish va ichki nazorat tizimini taʼminlamaslik, qonunga zid qarorlar qabul qilish yoki bunday qarorlarni qoʻllab-quvvatlash kiradi.

Shuningdek, rahbarlar oʻz vakolatlari doirasida qoidabuzarliklarning oldini olish choralarini koʻrmagani, isteʼmolchilarga yetkazilgan zararni kamaytirish yoki bartaraf etish boʻyicha harakat qilmagani, qoidabuzarliklar va ularning sabablarini yashirishga uringani yoki faoliyatida manfaatlar toʻqnashuviga yoʻl qoʻygani uchun ham javobgarlikka tortilishi mumkin.

Yana bir muhim oʻzgarish, Markaziy bank oʻz rasmiy saytida bank rahbarlariga nisbatan qoʻllanilgan sanksiyalar haqidagi maʼlumotlarni ularning toʻliq ism-shariflarini koʻrsatgan holda eʼlon qilish huquqiga ega boʻladi.