Ketma-ket pasayishlardan soʻng xalqaro oltin-valyuta zaxiralari yana koʻpaydi
Yanvar oyida Oʻzbekiston xalqaro zaxiralari oltin narxining yuqorilashi hisobiga $1,7 mlrddan koʻproqqa oshgan boʻlsa, xorijiy valyutadagi zaxirlar $1,3 mlrdga kamaydi.
Oʻzbekistonning oltin-valyuta zaxiralari yanvar oyida $1,72 mlrdga koʻpayib, 1 fevral holatiga koʻra $42,9 mlrdni tashkil qilmoqda. Bu haqida Markaziy bank 7 fevral kungi hisobotida maʼlumot berdi.
Oʻzbekiston xalqaro zaxiralari tarkibidagi oltin miqdori yanvar oyida $3 mlrddan koʻproqqa ortib, $35 mlrddan koʻproqni tashkil etdi. Aktivning bunday koʻtarilishiga jahon bozorida oltin narxining yuqorilashi sabab boʻlgan. Oltinning sof hajmi esa 0,3 mln troyaga oshib, 12,6 mln troyaga yetdi.
| Koʻrsatkichlar | 1 yanvar 2024 | 1 yanvar 2025 | 2 fevral 2025 |
| Rasmiy zaxira aktivlari (mlrd $) | 34,6 | 41,2 | 42,9 |
| Oltin (mlrd $) | 24,6 | 32,03 | 35,06 |
| Sof hajmi (mln troya unsiya) | 11,9 | 12,3 | 12,6 |
| Xorijiy valyutadagi zaxira aktivlari (mlrd $) | 9,4 | 8,6 | 7,3 |
Shunday boʻlsa-da, xorijiy valyutadagi aktivlar miqdori qariyb 1,3 mlrdga kamayib, $7,3 mlrdni tashkil qildi. Mazkur aktivlar tarkibidagi naqd valyuta va depozitlarning jami miqdori esa yilni $7,2 mlrd bilan boshladi.
Eslatib oʻtamiz, mamlakat xalqaro oltin-valyuta zahiralari dekabr oyida $0,3 mlrdga kamaygan edi.
Prognozlarga koʻra, oltin narxi yil davomida 3 000 dollargacha koʻtariladi. Maʼlumot uchun, jahon bozorida oltin narxi 5 fevral kuni 2882 dollargacha chiqib, hozirda bir unsiya uchun 2870 dollardan yuqoriroq narxda sotilmoqda.
