Fikrlovchi AI: Google yangi Gemini 2.5 modelini taqdim qildi.

Google 25 mart kuni Gemini 2.5 nomli yangi sunʼiy intellekt (AI) modellarini taqdim etdi. Ular inson darajasiga yaqin mulohaza yuritish va faktlarni tekshirish qobiliyatiga ega.

Taqdimotning markazida Gemini 2.5 Pro Experimental boʻlib, u Google’ning hozirgacha yaratilgan eng ilgʻor multimodal modeli sifatida tasvirlanmoqda. Yangi model Google AI Studio va Gemini Advanced ilovalari orqali foydalanishga taqdim etildi. Premium versiya oyiga $20 turadi.

Gemini 2.5 Pro SI texnologiyalaridagi raqobatga qoʻshilgan eng soʻnggi ishtirokchi boʻldi. Bu trend OpenAI kompaniyasining o1 modeli bilan boshlangan edi. Shundan beri Anthropic, DeepSeek, Google va xAI kompaniyalari murakkab matematik va dasturlash masalalarini aniq hal qiluvchi ilgʻor tizimlarni ishlab chiqmoqda. Google esa bu texnologiyani kelajakdagi barcha AI modellarida standart qilib joriy qilishini eʼlon qildi.

Benchmark natijalari

Dastlabki testlar Gemini 2.5 Pro ning kuchini tasdiqlamoqda:

• Aider Polyglot (kod yozish testi): 68,6% natija bilan OpenAI, Anthropic va DeepSeek dan ustun boʻldi.
• SWE-bench Verified (dasturiy muhandislik testi): 63,8%, bu Claude 3.7 Sonnet (70,3%) dan pastroq.
• “Humatiy’s Last Exam” (fanlar boʻyicha keng qamrovli test): 18,8% natija bilan aksariyat raqobatchilarni ortda qoldirdi.

Eng eʼtiborli yutuqlardan biri — 1 million tokenlik kontekst oynasi boʻlib, model taxminan 750 000 ta soʻz yoki “Uzuklar hukmdori” trilogiyasining hajmidagi maʼlumotlar bilan ishlay oladi. Google yaqin kelajakda bu koʻrsatkichni 2 million tokengacha oshirishni rejalashtirmoqda.