Fargʻonada hokim yordamchilari tomonidan 40 mlrd soʻmlik kredit mablagʻlari talon-toroj qilindi

Fargʻona viloyatida 2024 va 2025 yillarda olib borilgan tekshiruvlar davomida jami 26 nafar hokim yordamchisining qonunbuzarlik holatlari aniqlandi. Ular tomonidan 40 mlrd soʻmlik kredit mablagʻlari talon-toroj qilingani maʼlum boʻldi.

Xususan, 2024 yilda 10 nafar, joriy yilning oʻtgan davrida esa 16 nafar hokim yordamchisi imtiyozli kredit mablagʻlaridan maqsadsiz foydalangani uchun ularga nisbatan jinoyat ishi qoʻzgʻatilgan.

Nazorat tadbirlari jarayonida Fargʻona shahridagi hokim yordamchilari 1666 ta holatda 37 mlrd soʻm kredit mablagʻlarini talon-toroj qilgani yoki maqsadsiz sarflagani aniqlangan.

Masalan, Qirguli mahallasidagi hokim yordamchisi T. Quva tumanida yashovchi uch nafar fuqaro nomiga ularning xabarisiz 33 million soʻmdan kredit rasmiylashtirib, mablagʻlarni oʻzlashtirgan.

Maʼlumot uchun, Prezidentning 2021 yildagi PQ-55-sonli qaroriga muvofiq, hokim yordamchilari mahallalarda davlat dasturlari doirasida ajratilgan kreditlarni maqsadli ishlatish va ularning samaradorligini monitoring qilish vazifasi yuklatilgan.