Фарғонада ҳоким ёрдамчилари томонидан 40 млрд сўмлик кредит маблағлари талон-торож қилинди

Фарғона вилоятида 2024 ва 2025 йилларда олиб борилган текширувлар давомида жами 26 нафар ҳоким ёрдамчисининг қонунбузарлик ҳолатлари аниқланди. Улар томонидан 40 млрд сўмлик кредит маблағлари талон-торож қилингани маълум бўлди.

Хусусан, 2024 йилда 10 нафар, жорий йилнинг ўтган даврида эса 16 нафар ҳоким ёрдамчиси имтиёзли кредит маблағларидан мақсадсиз фойдалангани учун уларга нисбатан жиноят иши қўзғатилган.

Назорат тадбирлари жараёнида Фарғона шаҳридаги ҳоким ёрдамчилари 1666 та ҳолатда 37 млрд сўм кредит маблағларини талон-торож қилгани ёки мақсадсиз сарфлагани аниқланган.

Масалан, Қиргули маҳалласидаги ҳоким ёрдамчиси Т. Қува туманида яшовчи уч нафар фуқаро номига уларнинг хабарисиз 33 миллион сўмдан кредит расмийлаштириб, маблағларни ўзлаштирган.

Маълумот учун, Президентнинг 2021 йилдаги ПҚ-55-сонли қарорига мувофиқ, ҳоким ёрдамчилари маҳаллаларда давлат дастурлари доирасида ажратилган кредитларни мақсадли ишлатиш ва уларнинг самарадорлигини мониторинг қилиш вазифаси юклатилган.