Endi “Ipotekani qayta moliyalashtirish kompaniyasi” rasmiy daromadsiz fuqarolarga ham kredit ajratadi
Kredit mablagʻlari tashkilotning hamkor banklari orqali 22 sentabrdan boshlab ajratilishi rejalashtirilgan.
Oʻzbekiston “Ipotekani qayta moliyalashtirish kompaniyasi” 22 sentabrdan norasmiy daromadga ega mijozlarga berilgan ipoteka kreditlarini qayta moliyalashtirishni boshladi. Bu haqda kompaniya matbuot xizmati maʼlum qildi.
Yangi tizim barqaror daromad manbaiga ega, lekin uni hujjat bilan tasdiqlay olmaydigan fuqarolarga ham kredit olishni osonlashtiradi.
“Ushbu yangi mahsulot aholining bank xizmatlaridan foydalanish imkoniyatini kengaytirish yoʻlidagi muhim qadam hisoblanib, ipoteka bozorini rivojlantirish uchun xizmat qiladi”, — deyiladi bayonotda.
Maʼlumotlarga koʻra, joriy yilning birinchi yarmida yangi ipoteka kreditlari hajmi 9,4 trln soʻmni tashkil etib, 37,1% ga oshgan. Ipoteka oluvchilar soni 20,5% ga koʻpayib, 31,5 ming kishiga yetdi, oʻrtacha kredit hajmi esa 300 mln soʻmga yaqinlashdi.
Berilgan kreditlarning uchdan ikki qismidan koʻprogʻi (6,39 trln soʻm) Iqtisodiyot va moliya vazirligi tomonidan moliyalashtirilgan. Shu bilan birga, IQMK liniyasi boʻyicha ajratilgan resurslar 6% ga kamayib, 800 mlrd soʻmdan kamni tashkil etdi.
