Энди “Ипотекани қайта молиялаштириш компанияси” расмий даромадсиз фуқароларга ҳам кредит ажратади
Кредит маблағлари ташкилотнинг ҳамкор банклари орқали 22 сентябрдан бошлаб ажратилиши режалаштирилган.
Ўзбекистон “Ипотекани қайта молиялаштириш компанияси” 22 сентабрдан норасмий даромадга эга мижозларга берилган ипотека кредитларини қайта молиялаштиришни бошлади. Бу ҳақда компания матбуот хизмати маълум қилди.
Янги тизим барқарор даромад манбаига эга, лекин уни ҳужжат билан тасдиқлай олмайдиган фуқароларга ҳам кредит олишни осонлаштиради.
“Ушбу янги маҳсулот аҳолининг банк хизматларидан фойдаланиш имкониятини кенгайтириш йўлидаги муҳим қадам ҳисобланиб, ипотека бозорини ривожлантириш учун хизмат қилади”, — дейилади баёнотда.
Маълумотларга кўра, жорий йилнинг биринчи ярмида янги ипотека кредитлари ҳажми 9,4 трлн сўмни ташкил этиб, 37,1% га ошган. Ипотека олувчилар сони 20,5% га кўпайиб, 31,5 минг кишига етди, ўртача кредит ҳажми эса 300 млн сўмга яқинлашди.
Берилган кредитларнинг учдан икки қисмидан кўпроғи (6,39 трлн сўм) Иқтисодиёт ва молия вазирлиги томонидан молиялаштирилган. Шу билан бирга, ИҚМК линияси бўйича ажратилган ресурслар 6% га камайиб, 800 млрд сўмдан камни ташкил этди.
