Dollar rasmiy kursi 12 ming 300 soʻmdan pastga tushdi

Oʻzbekistonda milliy valyutaga nisbatan dollar kursi yana pasayishda davom etmoqda. 

Markaziy bank maʼlumotiga koʻra, 17 sentabr kuni amalda boʻladigan AQSh valyutasining rasmiy kursi 59,45 soʻmga arzonlab, 12 285,16 soʻmni tashkil etdi.

Soʻnggi marta dollar kursi bundan past darajaga 2023 yil dekabr oyida tushgandi.

Shu bilan birga dollar kursi fevral oyida qayd etilgan eng yuqori koʻrsatkich — 13 003,95 soʻmdan 720 soʻm pastladi.

Valyuta kurslari quyidagicha belgilandi:

AQSh dollari — 12 285,16 soʻm (-59.45 soʻm)

Yevro — 14 514,92 soʻm (+13.71 soʻm)

Rossiya rubli — 148.62 soʻm (-1,08 soʻm)

Funt sterling — 16 760,08 soʻm (-18,15 soʻm)