Dollar kursi 2023 yil avgust darajasiga qaytdi
Markaziy bank 7 oktabrdan boshlab dollarning rasmiy kursini 12 022,90 soʻm etib belgiladi. Bunday past koʻrsatkich soʻnggi marta 2023 yil avgust oyi boshida qayd etilgan edi. Umuman olganda, soʻm kursi yil boshidan beri 882 soʻmga mustahkamlandi.
Oʻzbekistonda dollar kursining pasayishi davom etmoqda. Markaziy bank maʼlumotiga koʻra, 7 oktabrdan boshlab AQSh dollari rasmiy kursi 37,58 soʻmga arzonlab, 12 022,90 soʻmni tashkil etdi. Bu koʻrsatkich 2023 yil avgust oyi boshidagi darajaga yaqinlashgan.
Mamlakatdagi koʻplab tijorat banklarida esa dollar almashuvi allaqachon 12 ming soʻm yoki undan past narxlarda amalga oshirilmoqda.
Shuningdek, boshqa xorijiy valyutalar kursi quyidagicha belgilandi:
- Yevro — 14 025,92 soʻm (−130,67)
- Funt sterling — 16 155,17 soʻm (−71,00)
- Rubl — 144,75 soʻm (−2,22)
Soʻnggi marta shunday darajadagi pasayish 2023 yil avgust oyida kuzatilgan edi. Shuningdek, dollar oʻzining eng yuqori koʻrsatkichidan — 13 003,95 soʻmdan — 981 soʻmga arzonladi.
Umuman olganda, soʻm kursi yil boshidan beri 882 soʻmga mustahkamlandi.
