Argentina prezidenti qoʻllab-quvvatlagan memkoin qisqa vaqtda $4 mlrdlik yoʻqotishga uchradi
Mamlakat aholisi va faollar prezidentni firibgarlikda ayblab, impichment talabini ilgari surmoqda.
Argentina prezidenti Xaver Miley memkoinni qoʻllab-quvvatlagan eng soʻnggi siyosatchi boʻldi. Keskin gapiruvchi populist Miley yanvar oyida prezidentlik inauguratsiyasidan oldin oʻz kriptovalyutasini ishga tushirgan Donald Trampning izidan bordi. 14 fevral kuni Miley oʻzining qariyb 4 million kuzatuvchisiga LIBRA nomli kriptovalyutasini targʻib qilib, uni xarid qilish uchun havola qoldirdi. Uning taʼkidlashicha, bu kichik biznes va tadbirkorlarni moliyalashtirish orqali mamlakat iqtisodiyotini rivojlantiradi.
Mileyning qoʻllab-quvvatlashi natijasida LIBRA’ning umumiy bozor qiymati $4,5 milliarddan oshdi. Narxlar esa deyarli noldan 4 dollargacha chiqdi. Biroq, xabarlar oʻchirilgandan bir necha soat oʻtgach, uning narxi yarim dollardan ham pastga tushib ketdi. Argentinadagi nodavlat tashkilotning maʼlum qilishicha, bu voqeadan 40 mingga yaqin odam, umumiy 4 milliard dollardan oshiq zarar koʻrgan.
Hozirda LIBRA tokenining bozor kapitali atigi $300 million atrofida baholanmoqda va nafaqat kripto savdogarlar, balki argentinalik siyosatchilar ham buni firibgarlik deb atashmoda. Argentina sudi esa Mileyga qarshi tergov ishi ochdi.
Mileyning memkoin mojarosi Argentinada katta shov-shuvga sabab boʻlmoqda. 17 fevral kuni Argentina fond bozori 5,6% ga quladi. Miley esa keyingi bayonotlarida bu ishga aloqador emasligini aytib, oʻz postlarini oʻchirishga qaror qilganini bildirdi.
Shunga qaramay, argentinalik huquqshunoslar, jumladan, Mileyning siyosiy raqibi Klaudio Lozano, prezidentga qarshi 100 dan ortiq firibgarlik boʻyicha shikoyat taqdim etdi. Natijada, sud tergov ishi ochishga qaror qildi va baʼzi siyosatchilar hatto Mileyni impichmentga tortishni talab qilmoqda.
Memkoinlar oʻzi nima?
Memkoinlar internetdagi trend va memlardan ilhomlangan raqamli aktivlardir. Ular odatda aniq maqsadga ega emas va koʻpincha qiziqarli yoki satirik loyiha sifatida yaratiladi. Blokcheyn texnologiyasi asosida qurilgan memkoinlar maʼlumotlarni markazlashmagan tarmoq orqali yozadi va ulashadi.
Mashhur memkoinlar:
Dogecoin ($DOGE)
Shiba Inu ($SHIB)
Ular dastlab hazil sifatida yaratilgan boʻlsa-da, keyinchalik katta miqdorda muxlislar toʻplashga muvaffaq boʻldi. Oʻzbekiston hududida memkoinlar Telegram messenjeri orqali ommalashmoqda. $NOT va $DOGS memkoinlari bunga yaqqol misol boʻla oladi.
