Аргентина президенти қўллаб-қувватлаган мемкоин қисқа вақтда $4 млрдлик йўқотишга учради

Аргентина президенти Хавьер Милей мемкоинни қўллаб-қувватлаган энг сўнгги сиёсатчи бўлди. Кескин гапирувчи популист Милей январь ойида президентлик инаугурациясидан олдин ўз криптовалютасини ишга туширган Доналд Трампнинг изидан борди. 14 февраль куни Милей ўзининг қарийб 4 миллион кузатувчисига LIBRA номли криптовалютасини тарғиб қилиб, уни харид қилиш учун ҳавола қолдирди. Унинг таъкидлашича, бу кичик бизнес ва тадбиркорларни молиялаштириш орқали мамлакат иқтисодиётини ривожлантиради.

Милейнинг қўллаб-қувватлаши натижасида LIBRA’нинг умумий бозор қиймати $4,5 миллиарддан ошди. Нархлар эса деярли нолдан 4 долларгача чиқди. Бироқ, хабарлар ўчирилгандан бир неча соат ўтгач, унинг нархи ярим доллардан ҳам пастга тушиб кетди. Аргентинадаги нодавлат ташкилотнинг маълум қилишича, бу воқеадан 40 мингга яқин одам, умумий 4 миллиард доллардан ошиқ зарар кўрган.

Ҳозирда LIBRA токенининг бозор капитали атиги $300 миллион атрофида баҳоланмоқда ва нафақат крипто савдогарлар, балки аргентиналик сиёсатчилар ҳам буни фирибгарлик деб аташмода. Аргентина суди эса Милейга қарши тергов иши очди.

Милейнинг мемкоин можароси Аргентинада катта шов-шувга сабаб бўлмоқда. 17 февраль куни Аргентина фонд бозори 5,6% га қулади. Милей эса кейинги баёнотларида бу ишга алоқадор эмаслигини айтиб, ўз постларини ўчиришга қарор қилганини билдирди.

Шунга қарамай, аргентиналик ҳуқуқшунослар, жумладан, Милейнинг сиёсий рақиби Клаудио Лозано, президентга қарши 100 дан ортиқ фирибгарлик бўйича шикоят тақдим этди. Натижада, суд тергов иши очишга қарор қилди ва баъзи сиёсатчилар ҳатто Милейни импичментга тортишни талаб қилмоқда.

Мемкоинлар ўзи нима?

Мемкоинлар интернетдаги тренд ва мемлардан илҳомланган рақамли активлардир. Улар одатда аниқ мақсадга эга эмас ва кўпинча қизиқарли ёки сатирик лойиҳа сифатида яратилади. Блокчейн технологияси асосида қурилган мемкоинлар маълумотларни марказлашмаган тармоқ орқали ёзади ва улашади.

Мавзуга доир: Президентлик курсисига ўтириши олдидан Трамп ва унинг рафиқаси Меланиа Трамп ўзининг мемкоинларини тақдим этишди. Мемкоинлар ўзи нима ва улар қанчалик рискли?

Машҳур мемкоинлар:

        Dogecoin ($DOGE)

        Shiba Inu ($SHIB)

Улар дастлаб ҳазил сифатида яратилган бўлса-да, кейинчалик катта миқдорда мухлислар тўплашга муваффақ бўлди. Ўзбекистон ҳудудида мемкоинлар Telegram мессенжери орқали оммалашмоқда. $NOT ва $DOGS мемкоинлари бунга яққол мисол бўла олади.