2025 yilning eng baxtli mamlakatlari
Finlandiya ketma-ket sakkizinchi yil ham jahonning eng baxtli mamlakati deb topildi.
Markaziy Osiyo davlatlari orasida Qozogʻiston 43-oʻrin bilan peshqadam boʻlgan boʻlsa, Oʻzbekiston 53-oʻrinni egalladi.
Dunyoning eng baxtli mamlakatlari eʼlon qilindi va yana bir bor Shimoliy Yevropa davlatlari eng yuqori oʻrinlarni egalladi. Finlandiya ketma-ket sakkizinchi yil dunyodagi eng baxtli mamlakat deb topildi. Daniya va Islandiya mos ravishda ikkinchi va uchinchi oʻrinlarni egalladi, Shvetsiya esa toʻrtinchi oʻrinda qayd etildi. Bu yilgi hisobot 140 dan ortiq mamlakatning baxtlilik darajasini baholadi.
Baxtlilik darajasi ijtimoiy qoʻllab-quvvatlash, sogʻliqni saqlash, korrupsiya darajasi va iqtisodiy barqarorlik asosida baholangan.
2025 yil uchun dunyodagi eng baxtli mamlakatlar quyidagi tartibda joylashdi:
- Finlyandiya
- Daniya
- Islandiya
- Shvetsiya
- Niderlandiya
- Kosta-Rika
- Norvegiya
- Isroil
- Lyuksemburg
- Meksika
Markaziy Osiyo mamlakatlari ham Jahon baxtlilik hisobotida oʻz oʻrinlariga ega. Qozogʻiston 43-oʻrinni, Oʻzbekiston 53-oʻrinni, Qirgʻiziston 75-oʻrinni va Tojikiston 90-oʻrinni egalladi. Reytingda mavjud ushbu davlatlar aholisi reytingga koʻra Turkiya(94-oʻrin) aholisidan koʻra baxtliroq hisoblanadi.
AQSh 24-oʻringa tushib, tarixidagi eng past natijalardan birini qayd etdi. Bu ijtimoiy ishonchning pasayishi va yolgʻizlik darajasining ortishi bilan bogʻliq. Ayniqsa, yoshlar orasida yolgʻizlik hissi kuchaygan.
Roʻyxatda eng oxirgi oʻrinni Afgʻoniston(147) egallagan.
Finlandiyaning baxt siri nimada?
Finlandiyaning yetakchi oʻrinda qolishining bir necha asosiy sabablari bor. Birinchidan, mamlakatda ijtimoiy himoya tizimi yuqori darajada rivojlangan boʻlib, fuqarolar sogʻliqni saqlash, taʼlim va turmush sharoitlari boʻyicha mustahkam qoʻllab-quvvatlanadi. Ikkinchidan, tabiat bilan uygʻunlik finlar hayotining ajralmas qismi boʻlib, toza havo, koʻllar va oʻrmonlarga yaqin yashash stress darajasini pasaytiradi.
Bundan tashqari, Finlandiyada sauna madaniyati muhim oʻrin tutadi. Aholining 90 foizi haftasiga kamida bir marta saunaga boradi, bu esa dam olish va sogʻliqni yaxshilashga yordam beradi. Mamlakatda korrupsiya darajasi juda past boʻlib, halollik va adolat tamoyillari ustuvor hisoblanadi. Shuningdek, "sisu" falsafasi – chidamlilik va qatʼiyatlilik finlar madaniyatining ajralmas qismi boʻlib, har qanday qiyinchilikni yengishda yordam beradi.
Baxtlilikdagi global tendensiyalar
Hisobot dunyo miqyosida baxtlilikka taʼsir qilayotgan muhim tendensiyalarni ham taʼkidlab oʻtdi. Ijtimoiy ishonchning pasayishi ayniqsa yoshlar orasida keskin sezilmoqda. Yolgʻizlik va ishonchsizlik koʻrsatkichi oshib borayotgan bir paytda, tadqiqotlar yaqinlar bilan birga ovqatlanish hayotdan qoniqishni oshirishini va depressiyani kamaytirishini koʻrsatmoqda.
Bundan tashqari, xayriya va yordam koʻrsatish ham baxtlilik darajasiga ijobiy taʼsir qiladi. Tadqiqot natijalariga koʻra, koʻngillilik va xayriya ishlariga jalb qilingan odamlar boshqalarga qaraganda baxtliroq boʻlishadi.
