2025 yilning dastlabki uch oyida xizmat koʻrsatish sohasida eng koʻp soliq toʻlagan korxonalar maʼlum boʻldi

Davlat soliq qoʻmitasi 2025 yilning yanvar-mart oylarida xizmat koʻrsatish sohasida eng koʻp soliq toʻlagan yirik korxonalar roʻyxatini eʼlon qildi. Ushbu davr mobaynida mazkur sohada faoliyat yuritayotgan yuridik shaxslar soni 160 403 taga yetdi. Ularning umumiy tovar aylanmasi 94,99 trillion soʻmni (taxminan 7,4 milliard AQSh dollari) tashkil etdi. Bu koʻrsatkichdan 21,56 trillion soʻmlik yoki 22,7 foiz ulush eng koʻp soliq toʻlagan kuchli 20 korxonaga toʻgʻri keldi.

Xizmat koʻrsatish sohasi boʻyicha 2025 yilning birinchi choragida jami 9,15 trillion soʻm miqdorida soliq toʻlangan boʻlib, uning 1,72 trillion soʻmi (yaʼni 18,8 foizi) eng yirik 20 ta korxona hissasiga toʻgʻri kelgan. Ushbu korxonalar imtiyozlaridan ham foydalangan 1,22 trillion soʻmlik soliq imtiyozlari ham qoʻllanilgan.

Eng koʻp soliq toʻlagan korxonalar orasida birinchi oʻrinni Asia Trans Gas MChJ egallab, 355,4 milliard soʻm soliq toʻlagan. Ikkinchi oʻrinda “Oʻzbektelekom” AJ (236,5 mlrd soʻm), uchinchi oʻrinda esa “Oʻzbekiston Temir Yoʻllari” AJ (210,5 mlrd soʻm) joylashgan. Ular ortidan Uzbekistan Airways AJ (159,8 mlrd soʻm), UNITEL MChJ XK (125,2 mlrd soʻm) va boshqa yirik kompaniyalar joylashgan.

Soliq tushumlarining taqsimotiga eʼtibor qaratilsa, eng katta ulushni foyda soligʻi tashkil etib, u umumiy tushumlarning 33,3 foizini (573,1 mlrd soʻm) tashkil etdi. Keyingi oʻrinlarda qoʻshilgan qiymat soligʻi – 24,7% (425,8 mlrd soʻm), jismoniy shaxslardan olinadigan daromad soligʻi – 14,6% (251 mlrd soʻm), ijtimoiy soliq – 13,5% (231,8  mlrd soʻm) va aksiz soligʻi – 5,7% (99 mlrd soʻm) qayd etilgan.

Korxonalar faoliyati yoʻnalishlari boʻyicha tahlil qilinadigan boʻlsa, transport va yoʻlovchi tashish sohasida “Oʻzbekiston Temir Yoʻllari”, Uzbekistan Airways, My Freighter, “Toshkent Metropoliteni”, “Uzbekistan Airports” va “Islom Karimov nomidagi Toshkent xalqaro aeroporti” yetakchilik qilmoqda. Aloqa va internet xizmatlari boʻyicha esa “Oʻzbektelekom”, UNITEL(Beeline) , COSCOM(Ucell), Universal Mobile Systems (Mobi Uz) va Yandex GO UB yetakchi soliq toʻlovchilar qatorida qayd etilgan.