2025 yilda Oʻzbekiston uy-joy bozori qanday oʻzgardi?

2025 yilda Oʻzbekistonda 319,5 mingta uy-joy oldi-sotdi shartnomasi rasmiylashtirilgan. Bu haqda Markaziy bank hisobotida maʼlum qilindi.

2024 yilga nisbatan koʻchmas mulk bozoridagi faollik 15,8% ga oshgan. Yilning soʻnggi choragida (oktabr–dekabr) fuqarolar 89,7 mingta bitim tuzgan boʻlib, bu oʻtgan yilning shu davriga nisbatan qariyb 25% koʻp.

Eng katta oʻsish Buxoro viloyatida kuzatilgan — 25,6%. Undan keyin Sirdaryo viloyati (23,1%) va Samarqand viloyati (19,2%) turadi. Toshkent shahri, Toshkent viloyati va Fargʻona viloyatida esa kvartira savdosi oʻrtacha 15,5% ga oshgan.

Markaziy bank tahlilchilariga koʻra, hududlarda uy-joyga talabning oshishi poytaxtdan tashqarida infratuzilma yaxshilanayotganini koʻrsatadi. Shuningdek, aholining daromadlari ortib borayotgani ham savdolar koʻpayishiga taʼsir qilmoqda.

Yil davomida ajratilgan ipoteka kreditlari hajmi 21,2 trillion soʻmni tashkil etib, bu oʻtgan yilga nisbatan 29% koʻp. Koʻrsatkich yil davomida barqaror oʻsib borgan va toʻrtinchi chorakda 6 trillion soʻmga yaqinlashgan.

Shu bilan birga, ipoteka hisobiga sotib olingan uy-joylar ulushi deyarli oʻzgarmagan — 2024 yildagi 21,3% ga nisbatan 22%.

Markaziy bank, shuningdek, foydalanishga topshirilgan uy-joy maydoni 7,2% ga oshib, 15,9 mln kvadrat metrga yetganini qayd etdi. Xorazm viloyatida qurilish hajmi 36% ga oshgan — solishtirish uchun, oʻsish boʻyicha ikkinchi oʻrindagi Surxondaryo viloyatida bu koʻrsatkich 6,7%ni tashkil etgan.

Birlamchi bozorda uy-joy narxlari oxirgi chorakda soʻmda 1,3% ga pasaygan, ammo dollarda 5,7% ga oshgan. Ikkilamchi bozorda esa narxlar milliy valyutada 0,7%, dollarda 7,9% ga koʻtarilgan.

Markaziy bank bu farqni valyuta kursining mustahkamlanishi, shuningdek, sotuvchilarning uy-joy qiymatini saqlab qolish maqsadida narxlarni dollarda belgilashi hamda asta-sekin hisob-kitoblarni milliy valyutada ifodalashga oʻtilayotgani bilan izohlaydi.

Uy-joy ijarasi narxlarining dollardagi oʻsish surʼati yil oxiriga kelib 8,3% ga yetgan, biroq Toshkent shahrida bu koʻrsatkich mamlakat oʻrtacha darajasidan biroz past. Shu bilan birga, soʻmda ijara narxlari deyarli oʻzgarmagan, bu esa bozorda taklif talabni yetarli darajada qoplayotganini koʻrsatadi.