Pullarni toʻgʻri boshqarishga yordam beruvchi TOP 5 ilova

Pulni qanday boshqarishni bilish har doim, ayniqsa, hozirgi zamonaviy texnologiyalar davrida, juda muhim qobiliyat hisoblanadi. Bunga erishish uchun oilaviy va shaxsiy xarajatlarni rejalashtirish hamda ularni kuzatib borish tavsiya etiladi. Mazkur qadamlarni roʻyobga chiqarishda moliyaviy rejalashtirish va xarajatlarni nazorat qilishga yordam beruvchi ilovalarning katta foydasi tegishi mumkin.

Pinkod.uz nashri aynan shu maqsadda shaxsiy moliyaviy boshqaruvni yaxshilashga yordam beradigan TOP 5 ilovalar roʻyxatini tuzdi.

1. Monefy

Monefy ilovasi oʻzining soddaligi bilan ajralib turadi. Bu ilova moliyaviy bilimga ega boʻlish shart boʻlmagan foydalanuvchilar uchun qulay. Xarajatlarni kuzatish bir necha bosqichda amalga oshadi, bu esa vaqtni tejash imkonini beradi. Ilova xarajatlarni grafiklar orqali koʻrsatib, ularni tahlil qilishni osonlashtiradi.

Asosiy xususiyatlar:

• Tez va oson xarajat qoʻshish: xarajatlarni qoʻshish uchun faqat summani yozish va toifani tanlash kifoya.
• Toifalarning sozlanishi: foydalanuvchi oʻz ehtiyojlariga mos ravishda xarajat toifalarini oʻzgartirishi mumkin.
• Sinxronizatsiya: maʼlumotlarni bir nechta qurilmada saqlash va ulardan foydalanish imkoniyati mavjud.

Havolalar: App Store | Google Play

2. Money Manager

Money Manager ilovasi moliyaviy hisobotlarni koʻrishni yoqtiradigan foydalanuvchilar uchun ideal. Ilova foydalanuvchilar uchun barcha xarajat va daromadlarni toifalarga boʻlib, moliyaviy xatti-harakatlarni chuqur tahlil qilish imkonini beradi. Shuningdek, bir nechta valyutani, jumladan, UZS (Oʻzbekiston soʻmi)ni qoʻllab-quvvatlaydi.

Asosiy xususiyatlar:

• Batafsil hisobotlar: ilova moliyaviy holatni grafik va diagrammalar orqali koʻrsatadi.
• Parol bilan himoyalash: ilova hisoblaringizni xavfsiz saqlash uchun parol qoʻllab-quvvatlaydi.
• Koʻp valyutali qoʻllab-quvvatlash: foydalanuvchilar turli valyutalarda hisob-kitob qilishlari mumkin.

Havolalar: App Store | Google Play

3. CoinKeeper

CoinKeeper ilovasi oʻzining noyob va intuitiv dizayni bilan koʻpchilikni jalb qiladi. Ilovada har bir xarajat toifasi uchun alohida ikonka mavjud boʻlib, bu xarajatlaringizni tez va oson kuzatib borishga yordam beradi. Moliyaviy maqsadlarni belgilash va ularga erishish rejasini tuzish uchun mukammal vosita.

Asosiy xususiyatlar:

• Vizual xarajat boshqaruvi: xarajatlarni grafik elementlar yordamida kuzatib borish.
• Moliyaviy maqsadlar: maqsadlaringizni belgilash va ular sari qadam-baqadam harakat qilish imkoniyati. Bunda maqsadga qancha qolgani maxsus belgilar orqali koʻrsatib turiladi. 
• Koʻp qurilma sinxronizatsiyasi: maʼlumotlaringizni bir nechta qurilmalarda ishlatishingiz mumkin.

Havolalar: App Store | Google Play

4. Spendee

Spendee oilaviy va umumiy byudjetni boshqarishda eng yaxshi yordamchi boʻla oladi. Ilova foydalanuvchilarga bank hisoblarini sinxronlashtirish, daromad va xarajatlarni kuzatish va hatto oilangiz bilan umumiy byudjet yaratishga imkon beradi.

Asosiy xususiyatlar:

• Guruh byudjeti boshqaruvi: oilangiz yoki guruh aʼzolaringiz bilan umumiy moliyani boshqarish imkoniyati.
• Koʻp valyutani qoʻllab-quvvatlash: UZS kabi mahalliy valyutalar bilan ishlash.

Havolalar: App Store | Google Play

5. Home Budget with Sync

Home Budget with Sync – bu moliyaviy nazoratni barcha jihatlarini oʻz ichiga olgan ilova. U sizga daromad va xarajatlarni kuzatish, jamgʻarmalarni boshqarish va oilangiz bilan maʼlumotlarni sinxronlashtirish imkonini beradi. Bu ilova oila uchun mukammal.

Asosiy xususiyatlar:

• Moliyaviy tahlil va rejalashtirish: moliyaviy maqsadlarni belgilash va xarajatlarni tahlil qilish.
• Jamgʻarma boshqaruvi: maqsadlaringiz uchun jamgʻarma ajratish imkoniyati.
  Sinxronizatsiya: byudjetni bir nechta qurilmada boshqarish imkoniyati orqali oilaviy byudjetni kuzatish mumkin. 

Havolalar: App Store | Google Play

Mazkur ilovalarni tanlashdagi qoʻshimcha jihatlar: interfeys, qoʻllab quvvatlanadigan til va boshqa funksiyalar haqidagi batafsil maʼlumotlarni keltirilgan havolalar orqali olishingiz mumkin.