AQSh Federal zaxira tizimi(FED) asosiy stavkani ketma-ket uchinchi marotaba oʻzgarishsiz qoldirdi
Bu qaror Prezident Trampning savdo urushi tufayli yuzaga kelgan narx bosimlari fonida foiz stavkalarini pasaytirish chaqiruvlariga qaramay qabul qilindi.
2025 yil 7 may kuni AQSh Federal zaxira tizimi (FED) asosiy foiz stavkasini 4.25%–4.5% oraligʻida oʻzgarishsiz qoldirishga qaror qildi. Bu qaror Prezident Trampning savdo urushi tufayli yuzaga kelgan narx bosimlari fonida foiz stavkalarini pasaytirish chaqiruvlariga qaramay qabul qilindi.
Bu Federal rezervning ketma-ket uchinchi marotaba stavkalarni oʻzgartirmasdan qoldirishi boʻldi. Avvalgi shunday qarorlar yanvar va mart oylaridagi yigʻilishlarda qabul qilingan edi.
Federal rezerv rasmiylari AQSh iqtisodiyotining mustahkamligini va Tramp tariflari keltirayotgan noaniqliklarni asosiy omillar sifatida koʻrsatdi. Tarif siyosatining iqtisodiyot va bandlikka qanday taʼsir koʻrsatishi hanuz noaniqligicha qolmoqda.
Federal rezerv raisi Jerom Pauell matbuot anjumanida shunday dedi:
“Iqtisodiyot asosiy koʻrsatkichlar boʻyicha mustahkam. Yangi savdo, fiskal va tartibga soluvchi siyosatlarning natijalarini kutish mumkin. Ishchi kuchi bozori kuchli, inflyatsiya past. Hozircha kutish bizga zarar keltirmaydi”.
Pauell, shuningdek, tarif siyosatining qayerda toʻxtashi va uning iqtisodiyotga taʼsirini oldindan aniq baholash qiyinligini taʼkidladi.
Avvalroq, AQSh Prezidenti Donald Tramp 4 may kuni bergan bayonotida AQSh koʻplab davlatlar, jumladan, Xitoy bilan savdo bitimlari boʻyicha faol muzokaralar olib borayotganini maʼlum qilgan edi.
