АҚШ Федерал захира тизими(FED) асосий ставкани кетма-кет учинчи маротаба ўзгаришсиз қолдирди

2025 йил 7 май куни АҚШ Федерал захира тизими (FED) асосий фоиз ставкасини 4.25%–4.5% оралиғида ўзгаришсиз қолдиришга қарор қилди. Бу қарор Президент Трампнинг савдо уруши туфайли юзага келган нарх босимлари фонида фоиз ставкаларини пасайтириш чақирувларига қарамай қабул қилинди.

Бу Федерал резервнинг кетма-кет учинчи маротаба ставкаларни ўзгартирмасдан қолдириши бўлди. Аввалги шундай қарорлар январь ва март ойларидаги йиғилишларда қабул қилинган эди.

Федерал резерв расмийлари АҚШ иқтисодиётининг мустаҳкамлигини ва Трамп тарифлари келтираётган ноаниқликларни асосий омиллар сифатида кўрсатди. Тариф сиёсатининг иқтисодиёт ва бандликка қандай таъсир кўрсатиши ҳануз ноаниқлигича қолмоқда.

Федерал резерв раиси Жером Пауэлл матбуот анжуманида шундай деди:

“Иқтисодиёт асосий кўрсаткичлар бўйича мустаҳкам. Янги савдо, фискал ва тартибга солувчи сиёсатларнинг натижаларини кутиш мумкин. Ишчи кучи бозори кучли, инфляция паст. Ҳозирча кутиш бизга зарар келтирмайди”.

Пауэлл, шунингдек, тариф сиёсатининг қаерда тўхташи ва унинг иқтисодиётга таъсирини олдиндан аниқ баҳолаш қийинлигини таъкидлади.

Аввалроқ, АҚШ Президенти Доналд Трамп 4 май куни берган баёнотида АҚШ кўплаб давлатлар, жумладан, Хитой билан савдо битимлари бўйича фаол музокаралар олиб бораётганини маълум қилган эди.