Tramp boj tariflari tufayli iPhone’lar narxi $2 000 dan yuqoriga koʻtarilishi mumkin — NY POST

AQSh prezidenti Donald Tramp tomonidan joriy etilgan yangi tariflar tufayli iPhone narxlari 30 foizdan 43 foizgacha oshishi mumkin. Bu haqida New York Post nashri xabar bermoqda.

Tahlilchilarning fikricha, agar Apple Xitoydan olib kiriladigan mahsulotlar uchun qoʻshimcha boj toʻlovlarini toʻliq isteʼmolchiga yuklasa, iPhoneʼlar ancha qimmatlashadi.

Masalan, AQShda $799 narxda sotilayotgan iPhone 16 modeli 43 foizlik narx oshishi bilan $1142 ga chiqishi mumkin. iPhone 16 Pro Max modeli esa hozirda $1599 turadi, lekin yangi tariflar kuchga kirsa, u deyarli $2300 boʻlishi mumkin. Xuddi shunday, yanvarda taqdim etilgan arzonroq iPhone 16e modeli ham $599 oʻrniga $856 boʻlishi mumkin.

Rosenblatt Securities tahlilchisi Barton Krokket bu vaziyatni Apple uchun "nihoyatda ogʻir" deb baholagan. Unga koʻra, agar Apple Xitoyda ishlab chiqarishni davom ettirsa va tariflar kuchga kirsa, kompaniya yiliga 40 milliard dollargacha zarar koʻrishi mumkin. Tramp prezidentligi davrida Apple baʼzi mahsulotlar uchun bojdan ozod etilgan edi, ammo bu safar hech qanday istisno koʻzda tutilmayapti.

Apple hali bu borada rasmiy bayonot bermagan. Ayni paytda kompaniya sotuvlarida pasayish kuzatilmoqda. Apple Intelligence deb nomlangan yangi sunʼiy intellekt xususiyatlari foydalanuvchilar orasida yetarlicha qiziqish uygʻotmayapti. Bu esa kompaniya uchun muhim boʻlgan AQSh, Yevropa va Xitoy bozorlarida talabning pasayishiga olib kelgan.

Bunday vaziyatda Apple mahsulotlariga raqobatchi boʻlgan Samsung kabi kompaniyalar yutqazmaydi. Chunki Samsung’ning mahsulotlari asosan Janubiy Koreyada ishlab chiqariladi va ular Xitoy mahsulotlariga nisbatan pastroq tariflarga duch keladi.

Apple kelgusida Xitoydan ishlab chiqarishni boshqa mamlakatlarga koʻchirish imkoniyatlarini koʻrib chiqishi mumkin. Ammo bu jarayon ham vaqt, ham katta sarmoya talab qiladi. Shu sababli, yaqin oylarda iPhone narxlarida keskin oʻzgarishlar yuz berishi mumkin.