Трамп бож тарифлари туфайли iPhone’лар нархи $2 000 дан юқорига кўтарилиши мумкин — NY POST

АҚШ президенти Доналд Трамп томонидан жорий этилган янги тарифлар туфайли iPhone нархлари 30 фоиздан 43 фоизгача ошиши мумкин. Бу ҳақида New York Post нашри хабар бермоқда.

Таҳлилчиларнинг фикрича, агар Apple Хитойдан олиб кириладиган маҳсулотлар учун қўшимча бож тўловларини тўлиқ истеъмолчига юкласа, иПҳонеълар анча қимматлашади.

Масалан, АҚШда $799 нархда сотилаётган iPhone 16 модели 43 фоизлик нарх ошиши билан $1142 га чиқиши мумкин. iPhone 16 Pro Max модели эса ҳозирда $1599 туради, лекин янги тарифлар кучга кирса, у деярли $2300 бўлиши мумкин. Худди шундай, январда тақдим этилган арзонроқ iPhone 16e модели ҳам $599 ўрнига $856 бўлиши мумкин.

Rosenblatt Securities таҳлилчиси Бартон Кроккет бу вазиятни Apple учун "ниҳоятда оғир" деб баҳолаган. Унга кўра, агар Apple Хитойда ишлаб чиқаришни давом эттирса ва тарифлар кучга кирса, компания йилига 40 миллиард долларгача зарар кўриши мумкин. Трамп президентлиги даврида Apple баъзи маҳсулотлар учун бождан озод этилган эди, аммо бу сафар ҳеч қандай истисно кўзда тутилмаяпти.

Apple ҳали бу борада расмий баёнот бермаган. Айни пайтда компания сотувларида пасайиш кузатилмоқда. Apple Intelligence деб номланган янги сунъий интеллект хусусиятлари фойдаланувчилар орасида етарлича қизиқиш уйғотмаяпти. Бу эса компания учун муҳим бўлган АҚШ, Европа ва Хитой бозорларида талабнинг пасайишига олиб келган.

Бундай вазиятда Apple маҳсулотларига рақобатчи бўлган Samsung каби компаниялар ютқазмайди. Чунки Samsung’нинг маҳсулотлари асосан Жанубий Кореяда ишлаб чиқарилади ва улар Хитой маҳсулотларига нисбатан пастроқ тарифларга дуч келади.

Apple келгусида Хитойдан ишлаб чиқаришни бошқа мамлакатларга кўчириш имкониятларини кўриб чиқиши мумкин. Аммо бу жараён ҳам вақт, ҳам катта сармоя талаб қилади. Шу сабабли, яқин ойларда iPhone нархларида кескин ўзгаришлар юз бериши мумкин.