АҚШда $5 млн эвазига харид қилиш имконияти мавжуд бўлган “олтин” виза тизими жорий этилади. Президент Доналд Трамп сешанба куни бўлиб ўтган матбуот анжуманида мазкур ташаббусни илгари сурди.

Трамп журналистларга АҚШда иш ўринларини яратадиган ёки сақлаб қоладиган катта миқдордаги маблағга эга хорижий инвесторларга доимий яшаш ҳуқуқини берадиган “ЭБ-5” иммиграцион инвестор визаси дастурини "олтин карта" деб номланган янги тизим билан алмаштиришини маълум қилди.

“Биз олтин карта сотамиз”, — деди Трамп. “Ушбу картанинг нархи тахминан 5 миллион долларни ташкил қилади”.

Мазкур виза нафақат АҚШда яшаш ва ишлаш ҳуқуқини беради, балки фуқароликни олишга ҳам йўл очади. Савдо вазири Ховард Лутникнинг сўзларига кўра, “Трамп олтин картаси” икки ҳафта ичида EB-5 визалари ўрнини эгаллайди. У шунингдек, эски виза тизимини самарасиз деб атади.

EB-5 визалари дастури 1990 йилда Конгресс томонидан хорижий инвестицияларни жалб этиш мақсадида жорий этилган бўлиб, камида 1 миллион доллар сармоя киритиб, 10 кишини иш билан таъминлай оладиган тадбиркорларга АҚШда яшаш ҳуқуқини берарди.

Трамп, шунингдек, россиялик олигархлар ҳам ушбу олтин картани қўлга киритиши мумкинлигини инкор қилмади.

Мавзуга доир: $TRUMP мемкоини ортидан 800 мингдан кўпроқ фойдаланувчи $2 миллиард йўқотди.

АҚШда яшаш учун “олтин” виза жорий этилиши мумкин