YouTube’нинг 2025 йилдаги реклама даромади рекорд даражага — $40,4 млрдга етди. Бу ҳақда Business Insider хабар берди.

Бу кўрсаткич илк бор Disney, NBC, Paramount ва Warner Bros. компанияларининг $37,8 млрдлик умумий реклама даромадидан ошиб кетган.

Шунингдек, YouTube’нинг умумий даромади қарийб $62 млрдни ташкил этди. The Hollywood Reporter маълумотига кўра, бу ҳатто Диснейънинг медиа-бўлинмаси даромади ($60,9 млрд)дан ҳам юқори.

Таҳлилчилар YouTube’ни “медиа бозорининг янги қироли” деб атамоқда. Уларнинг баҳолашича, платформанинг қиймати $500–560 млрд атрофида бўлиб, бу кўплаб анъанавий медиа компанияларидан анча юқори. Энг яқин рақобатчи сифатида Netflix кўрсатилмоқда — унинг бозор капиталлашуви $409 млрдни ташкил этади.

Моффетт Натансон прогнозларига кўра, YouTube’нинг кейинги ўсиши платформанинг глобал видеохостинг сифатидаги етакчи мавқеи ҳамда сунъий интеллектга киритилаётган инвестициялар билан боғлиқ бўлади.

Nielsen маълумотларига кўра, 2026 йил январида YouTube АҚШ телекўриш бозорининг 12,5% улушини эгаллаб, барча стриминг ва телевидение платформаларини ортда қолдирди.

Платформанинг тез ўсиши асосан креаторлар экотизими ва обуна хизматлари кенгайиши билан изоҳланади. 2021–2025 йиллар оралиғида YouTube контент яратувчиларга $100 млрд дан ортиқ маблағ тўлаган. Шунингдек, компания даромадининг қарийб учдан бир қисми YouTube TV ва бошқа премиум хизматлар ҳисобига шаклланмоқда.

YouTube реклама даромади $40,4 млрдга етиб, анъанавий медиадан ўзиб кетди