Ўзбекистонда шаҳарсозлик реновациясини амалга оширишда мулк эгаларининг розилиги мажбурий шартлардан бири сифатида белгиланмоқда. Қонунга кўра, реновация лойиҳаси концепцияси ишлаб чиқилган кундан бошлаб 2 ой ичида ҳуқуқ эгалари билан очиқ муҳокама ўтказилиши керак.

Очиқ муҳокама давомида объектларни реновация лойиҳасига киритиш учун ҳар бир объект эгаларининг камида 4/5 қисмининг нотариал тасдиқланган ёзма розилиги олиниши лозим. Бу талаб реновацияни амалга оширишнинг асосий шартларидан бири ҳисобланади.

Ҳуқуқ эгаси реновация лойиҳасида ўз хоҳишига кўра компенсация олиши ёки ҳиссадор сифатида иштирок этиши мумкин.

Компенсация биринчи навбатда реновация амалга оширилаётган ҳудудда янги қуриладиган турар ёки нотурар жой объектини мулк қилиб бериш шаклида тақдим этилади. Агар бу имкон бўлмаса, бошқа жойдан турар ёки нотурар жой берилиши мумкин.

Шунингдек, компенсация пул маблағлари ёки келишув битимида назарда тутилган бошқа шаклларда ҳам амалга оширилиши мумкин.

Маълумот учун, ҳуқуқ эгаси деганда шаҳарсозлик реновацияси ҳудудида жойлашган кўчмас мулк объектларининг эгаси бўлган жисмоний ёки юридик шахс тушунилади.

Қонун расмий эълон қилинган кундан эътиборан 6 ой ўтгач яъни 2026 йил 11 декабрдан кучга киради.

Реновация учун мулк эгаларининг камида 80 фоиз розилиги талаб этилади

Ўзбекистонда шаҳарсозлик реновацияси тўғрисидаги қонун қабул қилинди