Беларуслик банкир Александр Сотников “Миллий банклараро процессинг маркази” АЖ — HUMO тўлов тизими бошқаруви раиси этиб тайинланди. У мазкур лавозимда 2025 йил сентябридан буён ишлаб келган Улуғбек Баҳодиров ўрнини эгаллайди.

Тайинлов ҳақида ҳозирча компания томонидан алоҳида расмий баёнот берилмаган. Сотниковнинг исми HUMO расмий сайтининг ўзбек, рус ва инглиз тилларидаги раҳбарият бўлимларида бошқарув раиси сифатида кўрсатилган.

Бундан ташқари, Ягона корпоратив ахборот порталида HUMO раҳбари алмашганига оид янги муҳим факт ҳозирча эълон қилинмаган.

HUMO’да 44 кун ишлаб, лавозимидан кетганди

Александр Сотниковнинг HUMO’даги фаолияти ноодатий тайинловлар билан кечмоқда. Компания Кузатув кенгашининг 18 майдаги қарори билан у HUMO бошқаруви раисининг ўринбосари этиб тайинланган эди. Кейинчалик унинг лавозими бошқарув раисининг биринчи ўринбосари сифатида кўрсатилган.

Бироқ 1 июль куни Кузатув кенгаши Сотниковнинг ваколатларини муддатидан олдин тугатди. Шундай қилиб, у HUMO бошқарувида атиги 44 кун ишлаган. Қарорда унинг лавозимдан кетиш сабаби очиқланмаган. Сотниковнинг ўрнига Рустам Каримов компания ижро органи таркибига киритилган.

Орадан кўп ўтмай унинг HUMO бошқаруви раиси сифатида кўрсатилиши компанияда аввал қабул қилинган қарор қайта кўриб чиқилган бўлиши мумкинлигини англатади.

Александр Сотников ким?

Александр Сотников 1974 йилда туғилган. У 1996 йилда Беларусь давлат университетини географ-эколог ва ўқитувчи мутахассислиги бўйича, 2002 йилда Беларусь давлат иқтисодиёт университетини банк иши мутахассислиги бўйича тамомлаган.

Сотников банк карталари, процессинг, рақамли идентификация ва миллий тўлов тизимлари соҳасида 20 йилдан ортиқ тажрибага эга.

У 2009 йилдан “Белинвестбанк”нинг карталар марказига раҳбарлик қилган. 2013 йилда алоҳида компания сифатида ташкил этилган “Белкарт” миллий тўлов тизимининг дастлабки директорларидан бири бўлган ва тизимни 2015 йилгача бошқарган.

2015–2017 йилларда Беларусь Миллий банкининг рақамли банк технологияларини ривожлантириш бош бошқармаси раҳбари бўлиб ишлаган. Бу даврда у банклараро ягона идентификация тизими, масофавий хизматлар, электрон рақамли имзо ва биометрик технологияларни жорий этиш билан боғлиқ лойиҳаларда қатнашган.

2017 йилда Сотников “Белгазпромбанк” ижрочи директори, кейинчалик эса бошқарув раисининг ўринбосари лавозимини эгаллаган. У мазкур банкда 2021 йилгача фаолият юритган.

2021 йил майида Беларусь Банк процессинг маркази бош директори этиб тайинланган. Ушбу марказ “Белкарт” миллий тўлов тизимининг ишлаши, банк карталари бўйича операцияларни қайта ишлаш ва тўлов инфратузилмасини ривожлантиришга масъул ҳисобланади. Сотников марказни 2026 йил майигача — беш йил давомида бошқарган.

HUMO’да раҳбарлар тез-тез алмашмоқда

2025 йил январида HUMO устав капиталидаги 100 фоизлик давлат улуши “Paynet” компаниясига 65 млн долларга сотилганидан кейин тўлов тизимида бир неча марта раҳбар алмашди.

Компания ташкил этилганидан буён унга раҳбарлик қилган Шуҳратбек Қурбонов 2025 йил мартида лавозимини тарк этди. Унинг ўрнига тайинланган Алексей Максимов уч ойга яқин ишлади. Кейинчалик HUMO’га Мақсаджон Мухитдинов вақтинча, 2025 йил сентябридан эса Улуғбек Баҳодиров раҳбарлик қилди.

Александр Сотниковнинг тайинланиши расман тасдиқланса, у HUMO’нинг хусусийлаштирилишидан кейинги бир ярим йил ичидаги тўртинчи раҳбарига айланади.

HUMO’да яна раҳбар алмашди: Александр Сотников компания бошқарув раиси этиб тайинланди

HUMO’га яқинда тайинланган Александр Сотников лавозимидан кетди