2026 йилнинг биринчи чораги якунига кўра, Тошкент шаҳрида 1 сотих ернинг ўртача нархи 301 млн сўмни ташкил қилди. Бу ўтган йилнинг мос даврига нисбатан 6,4 фоизга паст кўрсаткич ҳисобланади.

Марказий банк маълумотларига кўра, пойтахтда ер нархлари сўнгги икки йилда сезиларли ўзгарувчан динамикада шаклланди. 2024 йил бошида 1 сотих ер нархи 370–380 млн сўм атрофигача чиққан бўлса, кейинги даврда пасайиш тенденцияси кучайган.

Регулятор бундай пасайишни шаҳар марказидан узоқроқ ҳудудларда ер таклифининг ошиб бораётгани билан изоҳламоқда. Яъни бозорга кўпроқ ер участкалари чиқиши айрим ҳудудларда нархларга пасайтирувчи босим берган.

Бу ҳолат кўчмас мулк бозорининг бошқа сегментларидаги вазиятдан фарқ қилади. Биринчи чоракда кўп қаватли уйлардаги хонадонлар нархи ўсишда давом этган. Март ойида бирламчи бозорда хонадонлар нархи доллар индексда 8,1 фоизга, сўм индексда 1,8 фоизга ошган.

Иккиламчи бозорда эса ўсиш суръати юқорироқ бўлиб, хонадонлар нархи доллар индексда 9,4 фоизга, сўм индексда 3 фоизга қимматлашган.

Яъни Тошкентда ер нархлари пасаяётган бир пайтда, хонадонлар бозорида нархлар ўсиши сақланиб қолмоқда. Бу ер участкалари бозорида таклиф ошаётгани, уй-жой бозорида эса талаб ҳали ҳам юқори эканини кўрсатади.

Тошкентда бир сотих ер нархи 301 млн сўмгача пасайди