Meta компанияси аккаунтларни тиклаш ва фирибгарларга қарши курашиш учун юзни таниш тизимини Facebook ва Instagram’га қайтаради.

2021 йил ноябрь ойида Facebook фойдаланувчиларнинг танқиди туфайли юзни таниш тизимидан воз кечганди. У суратга жойлаштиришдан олдин унга одамларни белгилашни таклиф қилади, шунингдек, улар акс этган суратлар ҳақида билдиришномалар юборади.

Фойдаланувчилар тизим ижтимоий тармоққа ўзларининг биометрик маълумотларини тўплаш ва сақлаш имконини беради, деб ҳисоблашган. Қайд этилишича, энди компания тизимни яна қайтармоқда — лекин у турли функцияларга эга бўлади.

У Facebook ва Instagram’даги аккаунтларни тиклаш учун ишлатилади. Бунда фойдаланувчи қисқа видео селфи юборади ва тизим уни профил фотосуратлари билан мослаштиради. Агар юз тасвирлари мос келса, фойдаланувчи ҳисобга кириш ҳуқуқига эга бўлади.

Бундан ташқари, функция аккаунт бузиб кирилганига шубҳа туғилса, профил маълумотларини ўғирлаган фирибгарларнинг унга киришига йўл қўймаслик учун ҳам қўлланилади. Функция ҳозирча фақат синовдан ўтказилмоқда.

Функциядан иккинчи фойдаланиш ҳолати эса фирибгарларга қарши кураш ҳисобланади.

Тизим рекламани текширади ва агар унда “ўлжа” сифатида машҳур одамнинг сурати борлигига шубҳа қилса, уни ҳақиқий фотосуратлари билан таққослайди. Агар мослик тасдиқланса, реклама фирибгарлик сифатида блокланади.

Бу хусусият машҳурлар ва жамоат арбобларининг кичик рўйхати учун ҳам синовдан ўтказилмоқда, аммо “яқин ҳафталарда” кўпроқ машҳур одамлар қўшилади. Агар хоҳласалар, улар бундай “ҳимоя”дан ҳам воз кечишлари мумкин.

Meta компанияси Facebook ва Instagram’га юзни таниш тизимини қайтаради