Zootopia 2 анимацион фильмлар тарихидаги энг йирик очилишга эришди

Walt Disney компаниясининг ҳайвонлар шаҳри ҳақидаги машҳур анимацион фильм давоми кутилганидан ҳам кучли старт олди. 

Якшанба куни эълон қилинган студия ҳисоб-китобларига кўра, Zootopia 2 Шимолий Америкада дам олиш кунлари 96 миллион доллар, Шукроналик байрамининг беш кунида 156 миллион доллар ва чоршанба кунги премьерадан буён дунё бўйлаб ҳайратланарли 556 миллион доллар даромад кўрди.

Бу натижа уни анимацион фильмлар тарихидаги энг катта халқаро очилиш, барча жанрлар бўйича тўртинчи энг йирик глобал дебют ва 2025 йилнинг халқаро миқёсда энг яхши стартига айлантирди. 

Бу 2025 йилда Шимолий Америкадаги олтинчи энг йирик премьера бўлди. Аммо фильмнинг энг катта бозори Хитойдир. У ердаги чипталар сотувидан тушган 272 миллион долларлик улкан сумма фильмнинг умумий глобал даромадининг деярли ярмини ташкил этди. Америкада ишланган ҳеч бир анимацион фильм ҳали бунчалик катта натижа билан очилмаган эди. Бу Хитойда “Қасоскорлар: Интиҳо” (Avengers: Endgame) фильмидан кейин барча даврларнинг иккинчи энг яхши хорижий фильм премьераси бўлди.

Бир пайтлар Хитойдаги бундай натижа Голливуд учун деярли одатий ҳол эди. Бироқ сўнгги йилларда геосиёсий муносабатларнинг кескинлашуви сабабли касса натижалари, юмшоқ қилиб айтганда, кутилмаган тус олди. “Юра даври дунёси” (Jurassic World) каби саноқли истиснолардан ташқари, Голливуд Хитой кинотеатрларидан деярли умидини узган ва блокбастерлар бюджетини шунга мос равишда қайта кўриб чиқаётган эди.

“Zootopia 2”нинг Хитойдаги ушбу катта муваффақияти шунчаки тасодиф ёки муносабатлардаги илиқлашув белгиси бўлиши мумкин. Сўнгги йилларда кинотеатрларда намойиш этиладиган фильмларни цензура қиладиган Хитой кўпроқ маҳаллий фильмларга устунлик бераётган эди. Шу йилнинг бошида маҳаллий блокбастер “Не Чжа 2” (Ne Zha 2) Хитойда 1,8 миллиард доллар даромад келтирди.

Фильм ҳозирда бутун дунёда, жумладан Ўзбекистон кинотеатрларида ҳам намойиш этилмоқда.