Зоминдаги Ramada Encore by Wyndham меҳмонхонаси 324,5 млрд сўмга сотилди
Аукционда ягона иштирокчи бўлган Ref Bridge Invest МЧЖ ғолиб бўлди. Компания жорий йил 2 апрель куни ташкил этилган бўлиб, устав капитали 25 млрд сўмни ташкил қилади. Жамият 100 фоиз улуши Феруза Бобоевага тегишли бўлиб, унга тегишли бошқа компания аввалроқ Зоминдаги осма-кўприкни сотиб олган эди.
6 апрель куни E-aukison платформасида Жиззах вилояти Зомин туманидаги Ramada Encore by Wyndham меҳмонхона мажмуаси сотилди.
Аукционда ягона харидор Ref Bridge Invest МЧЖ бўлган. У 324,55 млрд сўм таклиф қилиб ғолиб бўлган.
Қайд этилишича, компания ушбу суммани аллақачон тўлаб бўлган.
Ягона давлат реестрига кўра, Ref Bridge Invest МЧЖ компанияси жорий йил 2 апрель куни ташкил этилган бўлиб, меҳмонхона фаолияти билан шуғулланади. Компания устав капитали 25 млрд сўм бўлиб, унинг юз фоизига Бобоева Феруза Файзиевна эгалик қилади.
Шунингдек, у Ref Ropeway Invest МЧЖ компаниясининг ҳам ягона таъсисчиси ҳисобланади. Ушбу компания январь ойида NBU Invest Group’дан Зоминдаги канат йўли оператор компаниясини 215 млрд сўмга сотиб олган.
Мажмуа Жиззах вилояти, Зомин тумани, Дуоба ҚФЙ, Арчали қишлоғида жойлашган. Маълумотларга кўра, ушбу бино Туронбанк маблағлари ҳисобига қурилган.
