Янги кредит ташкилоти: микромолия банкларини ташкил этишга рухсат берилди
Бундай ташкилотлар кейинчалик ўз фаолиятини банк шаклига ҳам айлантириши мумкин.
2025 йил 11 февралда қабул қилинган (ЎРҚ-1026-сон) қонун билан айрим қонун ҳужжатларига ўзгартириш ва қўшимчалар киритилди. Бу ҳақида Адлия вазирлигининг “Ҳуқуқий ахборот” Telegram канали хабар берди.
Ушбу қонун микромолия ташкилотлари ва тижорат банклари ўртасидаги ўзаро боғлиқликни кучайтиришга хизмат қилади. Шунингдек, микромолия ташкилотларига қўшимча молиявий ресурсларни, жумладан, депозитларни жалб этиш имкониятини яратади.
Қонунга мувофиқ, банк хизматларини белгиланган шартлар асосида кўрсатиш ваколатига эга бўлган микромолия банки институти жорий этилади.
“Банклар ва банк фаолияти тўғрисида”ги қонунга киритилган ўзгартиришларга кўра, қуйидаги кредит ташкилотлари ўз фаолиятини ўзгартириши мумкин:
- Микромолия ташкилоти – микромолия банки фаолиятига ўтиш имкониятига эга.
- Микромолия банки – банк фаолиятига ўзгариши мумкин.
- Тижорат банки – микромолия банки сифатида фаолият юритиши мумкин.
- Микромолия банки – микромолия ташкилоти сифатида қайта ташкил этилиши мумкин.
Шунингдек, “Лицензиялаш, рухсат бериш ва хабардор қилиш тартиб-таомиллари тўғрисида”ги қонунга киритилган қўшимчаларга кўра, микромолия банки фаолиятини амалга ошириш ҳуқуқини берувчи лицензия Марказий банк томонидан берилади.
