Янги IOS 26’даги энг муҳим янгилик ва ўзгаришлар

Apple 9 июнь куни бўлиб ўтган WWDC тадбирида янги дастурий таъминотларини тақдим этди. 

iOS операцион тизимининг навбатдаги версияси аввал тахмин қилинганидек iOS 26 деб номланди. Бу номлаш тизими йил кетма-кетлигига асосланган бўлиб, iPadOS, macOS, visionOS каби бошқа Apple тизимларида ҳам худди шундай тамойил қўлланилган. Компаниянинг айтишича, бу ўзгариш фойдаланувчилардаги чалкашликни камайтириш учун амалга оширилган.

Liquid Glass

iOS 26 Apple томонидан iOS 7’дан бери тақдим этилган энг йирик дизайн янгиланишидир. Янги дизайн концепцияси “Liquid Glass” (суюқ ойна) деб номланади ва компания бу услуб кейинги ўн йиллик iOS дизайнининг асосига айланишини таъкидлади.

Liquid Glass — фойдаланувчининг атроф-муҳитини акс эттирувчи ва унга мослаша оладиган график эффект бўлиб, интерфейс элементларига чуқурлик ва динамизм бахш этади. Бу дизайн барча асосий тизим элементларига – тугмалар, виджетлар, илова белгилар, менюлар ва навигация панелигача татбиқ этилган. У ёруғлик ва қоронғулик шароитларига мослаша олади, ҳаракатга мос равишда нурлар ва аксларни ўзгартиради.

iOS 26’нинг янги кўриниши Apple иловалари, билдиришномалар, бошқарув маркази ва ҳатто қулфланган экран дизайнида ҳам яққол кўзга ташланади. Apple ишлаб чиқувчиларга ҳам Liquid Glass дизайнидан ўз иловаларида фойдаланиш учун янги воситалар тақдим этмоқда. Бу элемент iPadOS 26, macOS Tahoe, visionOS 26, tvOS 26 ва watchOS 26’да ҳам жорий этилади.

Янги дизайн фақатгина эстетик кўринишни эмас, балки интерфейс функционаллиги ҳам янгилайди. Менюлар, бошқарув элементлари ва ойналар эндиликда янада силлиқ ва юмалоқ бурчакларга эга. Иловалардаги устун менюлар эса контекстга қараб шаклини динамик тарзда ўзгартира олади.

Apple камера иловасининг жойлашувини соддалаштирилган навигация билан оптималлаштирди. Унда сурат ва видео алмаштиргичлари мавжуд бўлиб, бошқа параметрлар тугмани босиш орқали очилувчи менюлар ортида жойлашган. Apple, шунингдек, Кутубхона ва Тўпламлар кўринишлари учун алоҳида ёрлиқларни қайта қўшиш мақсадида Суратлар иловасини ҳам янгилади. Суратлар иловасида исталган тасвир учун Фазовий саҳна функциясини фаоллаштириш орқали расмнинг ноёб уч ўлчовли кўринишини олиш имконияти мавжуд.

Камера, Фотосуратлар, Safari, FaceTime, Apple Music ва Apple Podcasts иловалари янгиланган дизайнни қўллаб-қувватлайди. Қулфланган экранда суюқ ойнали вақт кўрсаткичи фон расми устига кенгайиб-торайиб жойлашади. Бош экранда эса чуқурлик эффектига эга виджетлар ва белгилар кўринади. Шунингдек, қулфланган экранда 3D эффектга эга фазовий фон расмлари функцияси ҳам мавжуд.

Apple Intelligence

Apple янги дизайн билан бир қаторда iPhone’да мавжуд бўлган Apple Intelligence хусусиятларини кенгайтирмоқда. Хабарлар, FaceTime ва Телефон иловаларида бошқа тилда сўзлашувчи киши билан мулоқот қилаётганда суҳбатларни автоматик равишда таржима қилиш учун Жонли Таржима хизмати қўллаб-қувватланади.

Визуал Интеллект эндиликда экранда нима борлигини англайди ва ChatGPT интеграцияси орқали кўраётган нарсалар ҳақидаги саволларга жавоб бера олади. Бу хусусият маҳсулотларни топиш, тақвимга тадбирларни қўшиш ва бошқа кўплаб вазифаларни бажаришда ёрдам беради. Расмлар майдончаси ChatGPT ёрдамида турли услубларда расмлар яратишни қўллаб-қувватлайди. Genmoji эса янги эможини ҳосил қилиш учун бир неча emoji белгиларини бирлаштириш ва тавсифлар қўшиш орқали бутунлай янги emoji белгисини яратиш имконини берувчи янги хусусиятга эга.

Shortcuts иловаси матнни умумлаштириш, расмлар яратиш ёки Apple Intelligence моделларидан фойдаланиш каби ақлли ҳаракатларни қўллаб-қувватлайди, бу эса автоматлаштириш жараёнларини яратишни ҳар қачонгидан ҳам осонлаштиради. Эслатмалар хатлар асосида вазифалар, озиқ-овқат маҳсулотлари ва кузатувларни таклиф қилиши, шунингдек, тегишли эслатмаларни автоматик равишда бўлимларга ажратиши мумкин.

Телефон ва аудио тажрибалардаги янгиликлар

Телефон иловасида янгиланган интерфейс: Сараланганлар, Сўнгги чақирувлар ва Овозли хабарлар ягона саҳифада жамланган. Янги Чақирувларни текшириш функцияси номаълум рақамлардан чақирув сабабини аниқлаб беради. Hold Assist эса кутуш режимида операторнинг жавоб беришини сиз учун кузатиб боради.

Apple Games иловаси ўйинларни топиш, тавсиялар олиш ва дўстлар билан мусобақалашиш учун ягона марказ бўлади.

AirPods 4 ва AirPods Pro 2 iOS 26’да студия сифатидаги овоз ёзишни, видео ва қўнғироқларда яхшилланган аудио сифатни таъминлайди. AirPods’ларни суратга олиш ёки видео ёзиш тугмаси сифатида ишлатиш ҳам мумкин. Adaptive Power функцияси эса батарея сарфини сунъий интеллект орқали оптималлаштириб, экран ёрқинлигини мослаштиради.

Қачон ва қайси қурилмаларда мавжуд?

iOS 26 ҳозирча фақат ишлаб чиқувчилар учун мавжуд. Оммабоп бета версияси июль ойида чиқади, тўлиқ версия эса сентябрда янги iPhone’лар билан бирга чиқарилади.

Қуйидаги моделларда iOS 26 қўллаб-қувватланади:

• iPhone 16e, 16, 16 Plus, 16 Pro, 16 Pro Max
• iPhone 15, 15 Plus, 15 Pro, 15 Pro Max
• iPhone 14, 14 Plus, 14 Pro, 14 Pro Max
• iPhone 13, 13 mini, 13 Pro, 13 Pro Max
• iPhone 12, 12 mini, 12 Pro, 12 Pro Max
• iPhone 11, 11 Pro, 11 Pro Max

iPhone XR, XS ва XS Max эса бу янгиланишни қабул қилмайди.

Шуни алоҳида таъкидлаш керакки, Apple Intelligence функциялари фақат iPhone 15 Pro, 16 линиясидаги барча моделлар ва iPhone 16e да ишлайди.