Халқ банкининг суғурта компанияси Давактив бошқарувига ўтказилди
Халқ банкига тегишли “Халқ Суғурта” АЖнинг 100 фоиз акциялари Давлат активларини бошқариш агентлигига ўтказилди. Устав капитали 80 млрд сўм бўлган компания 2026–2027 йилларда хусусийлаштирилиши режалаштирилган давлат активлари рўйхатига киритилган. Суғурталовчи жорий йилнинг биринчи ярмида 15,4 млрд сўм соф фойда олган.
Халқ банкининг шўъба корхонаси ҳисобланган “Халқ Суғурта” АЖнинг барча акциялари Давлат активларини бошқариш агентлигига (Давактив) ўтказилди. Бу ҳақда эълон қилинган корпоратив маълумотларда келтирилган.
Халқ банки кузатув кенгаши тегишли қарорни 21 сентябрь куни қабул қилган. Акцияларга эгалик ҳуқуқи эса 16 октябрда ўзгарган.
Давактивга номинал қиймати 1 000 сўмдан бўлган 80 млн дона акция ўтказилган. Уларнинг умумий номинал қиймати 80 млрд сўмни ташкил этади. Мазкур пакет суғурта компанияси устав капиталининг 100 фоизига тенг.
Таъкидлаш жоизки, 80 млрд сўм компаниянинг сотув нархи эмас, балки ўтказилган акцияларнинг номинал қиймати ҳисобланади.
“Халқ Суғурта” 2026 йил 28 августдаги ПФ–177-сонли президент фармони билан тасдиқланган хусусийлаштириш дастурига киритилган. Унга кўра, компаниянинг давлат улушини 2026–2027 йилларда оммавий савдоларга чиқариш режалаштирилган.
Шу тариқа, акцияларнинг Давактивга ўтказилиши суғурта компаниясини хусусийлаштиришга тайёрлаш босқичи ҳисобланади. Ҳозирча унинг сотувга чиқарилиш санаси, бошланғич нархи ёки потенциал харидори ҳақида маълумот эълон қилинмаган.
Компаниянинг молиявий натижалари қандай?
2026 йил 1 июль ҳолатига “Халқ Суғурта”нинг жами активлари 278,54 млрд сўмни, устав капитали эса 80 млрд сўмни ташкил этган.
Компания йилнинг биринчи ярмида 30,12 млрд сўм даромад олган. Соф фойда эса 15,42 млрд сўмга етган.
Суғурта компанияси 2011 йил май ойида ташкил этилган бўлиб, ҳаётни суғурта қилишдан ташқари суғурта хизматларини кўрсатишга ихтисослашган.
Халқ банки ошкор қилган маълумотларга кўра, “Халқ Суғурта” чиқарилгач, банкнинг камида 10 фоиз улушга эга бўлган корхоналари сони бештани ташкил этмоқда.
Хусусан, банк “Халқ Лизинг”, “Халқ Факторинг”, “Халқ микромолия ташкилоти” ва “Perfect capital investment” компанияларининг 100 фоиз улушига, шунингдек, “United Venchures”нинг 14 фоиз улушига эгалик қилади.
