Uzum Nasiya микроқарзларини берувчи Tezcoin микромолия бозорининг 36 фоизини эгаллади
Ўзбекистондаги микромолия ташкилотлари активлари бир йил ичида деярли икки баравар ошиб, 18,9 трлн сўмга етди. Шу фонда Tezcoin’нинг ўзи сектор активларининг қарийб 36 фоизини, кредит портфелининг эса 38 фоизга яқин қисмини жамлаган.
Ўзбекистонда микромолия бозори тез суръатларда ўсишда давом этмоқда. Марказий банк маълумотларига кўра, 2026-йил 1-август ҳолатига микромолия ташкилотларининг жами активлари 18,9 трлн сўмга етган. Бир йил аввал бу кўрсаткич 9,47 трлн сўм эди.
Шу тариқа, сектор активлари бир йил ичида қарийб икки баравар ошган. Микромолия ташкилотларининг соф кредит портфели ҳам 8,67 трлн сўмдан 16,86 трлн сўмга етиб, 95 фоизга ўсган.
Бозордаги энг йирик иштирокчи Tezcoin бўлиб қолмоқда. Компания активлари 2025-йил 1-августдаги 2,23 трлн сўмдан бир йил ичида 6,8 трлн сўмга етган. Бу 206 фоизлик ўсиш дегани.
Tezcoin’нинг соф кредит портфели ҳам 2,19 трлн сўмдан 6,37 трлн сўмга ошган. Натижада компания Ўзбекистондаги микромолия ташкилотлари жами активларининг қарийб 36 фоизини, кредит портфелининг эса 37,8 фоизини ўзида жамлаган.
Таққослаш учун, 1-август ҳолатига Shaffof-Moliya активлари 1,78 трлн сўм, TBC Credit’ники 1,19 трлн сўм, Fortuna Biznes’ники эса 1,17 трлн сўмни ташкил этган. Tezcoin активлари ушбу уч компаниянинг жами активларидан ҳам юқори.
Tezcoin Uzum экотизимидаги истеъмол молияси хизматлари билан боғланган. Uzum Bank расмий сайтида Uzum Nasiya орқали бериладиган микроқарзлар “Uzum Fintech Hub” ва Tezcoin микромолия ташкилоти томонидан тақдим этилиши кўрсатилган.
Uzum Bank орқали 25 млн сўмгача микроқарз олиш мумкин. Шу сабаб Tezcoin активлари ва кредит портфелининг кескин ўсиши Uzum экотизимида бўлиб тўлаш ва микроқарз хизматларининг кенгайиши фонида юз бермоқда.
2026-йил 1-август ҳолатига Марказий банк статистикасида 138 та микромолия ташкилоти қайд этилган. Шунга қарамай, сектор активларининг учдан биридан кўпроғи битта компания ҳиссасига тўғри келмоқда.
