UzAuto Motors’нинг чораклик соф фойдаси 16 фоизгача камайди
UzAuto Motors 2026 йилнинг биринчи чорагида 10,9 трлн сўм тушум кўрди. Бу ўтган йилнинг мос даврига нисбатан 12,2 фоизга кўп. Шунга қарамай, компаниянинг соф фойдаси 648,3 млрд сўмни ташкил этиб, йиллик таққослаганда 16 фоизга камайди.
Компаниянинг I чоракдаги молиявий натижалари ҳақида батафсил:
“UzAuto Motors” АЖ 2026 йилнинг январь–март ойларида тушумини оширган бўлса-да, якуний соф фойдада пасайиш қайд этди. Бу ҳақда компания эълон қилган молиявий ҳисоботда келтириб ўтилган.
Ҳисоботга кўра, компаниянинг 2026 йил биринчи чорагидаги тушуми 10,88 трлн сўмга етган. 2025 йилнинг мос даврида бу кўрсаткич 9,7 трлн сўмни ташкил этган эди. Яъни бир йил ичида тушум 1,19 трлн сўмга ёки 12,2 фоизга ошган.
Бироқ операцион харажатлар, айниқса сотиш харажатларидаги кескин ўсиш якуний натижага босим қилган. Компаниянинг сотиш харажатлари бир йил ичида 349,4 млрд сўмдан 1 трлн сўмгача ошган. Бу 655 млрд сўмлик ўсиш бўлиб, харажатлар қарийб 2,9 баробарга кўпайганини англатади. Маъмурий харажатлар эса, аксинча, 225,9 млрд сўмдан 190,7 млрд сўмгача камайган.
Сотиш таннархи ҳам ўсган, бироқ тушумга нисбатан анча паст суръатда. 2025 йил биринчи чорагида сотиш таннархи 8,66 трлн сўм бўлган бўлса, 2026 йилнинг мос даврида бу кўрсаткич 8,98 трлн сўмга етган. Ўсиш 321,9 млрд сўмни ёки 3,7 фоизни ташкил этган.
Шу омиллар фонида операцион фойда деярли ўзгармаган. 2025 йил биринчи чорагида компаниянинг операцион фойдаси 738,5 млрд сўм бўлган бўлса, 2026 йилнинг мос даврида бу кўрсаткич 749,8 млрд сўмга етган.
Фойда солиғи харажатлари эса 144,8 млрд сўмдан 157,2 млрд сўмгача ошган. Якунда компаниянинг соф фойдаси 648,3 млрд сўмгача камайган (2025 йилда — 771,9 млрд). Бу аввалги йилга нисбатан 123,7 млрд сўмлик ёки 16 фоизлик пасайишдир. Бир акцияга тўғри келадиган базавий фойда ҳам 2 850,78 сўмдан 2 393,98 сўмгача тушган.
Компаниянинг баланс кўрсаткичларида эса ўсиш кузатилган. 2026 йил 31 март ҳолатига UzAuto Motors’нинг жами активлари 34 трлн сўмдан ошган. 2025 йил якунида бу кўрсаткич 32,2 трлн сўм эди. Яъни уч ой ичида компания активлари қарийб 1,8 трлн сўмга кўпайган.
Активлар таркибида захиралар ҳажми юқорилигича қолмоқда. 2026 йил 31 март ҳолатига компания захиралари 13,3 трлн сўмни ташкил этган. Бу 2025 йил якунидаги кўрсаткичдан 1,3 трлн сўмга кўп. Пул маблағлари ва уларнинг эквивалентлари эса камайиб, 833,9 млрд сўмни ташкил қилган.
Компаниянинг хусусий капитали ҳам ошган. 2025 йил охирида UzAuto Motors’нинг жами хусусий капитали 15,4 трлн сўм бўлган бўлса, 2026 йил март охирида бу кўрсаткич 16,2 трлн сўмга етган. Мажбуриятлар эса 17,8 трлн сўмни ташкил этган.
UzAuto Motors’нинг устав капитали 2026 йил 31 март ҳолатига 3 трлн 175,3 млрд сўмни ташкил этган.
