Тошкентнинг қайси туманида уй-жой нархи арзонроқ?
Энг юқори бирламчи уй-жой ва ижара нархи Мирообод туманида кузатилган бўлса, энг паст кўрсаткичлар Бектемир туманида қайд этилди.
Иккиламчи бозорда эса Яккасарой энг қиммати, Сирғали эса энг арзони бўлиб турибди.
Ўзбекистон Ипотекани қайта молиялаштириш компанияси Тошкент шаҳри уй-жой бозорининг 2025 йилнинг иккинчи чораги бўйича таҳлилини тақдим этди. Ҳисоботга кўра, пойтахт туманларида бирламчи ва иккиламчи уй-жой нархлари ҳамда ижара қийматларида турлича динамик кузатилди.
Туманлар кесимида нархлар
Миробод – Тошкентнинг энг қиммат туманларидан бири бўлиб қолмоқда. Бу ерда 1 кв.м бирламчи уй нархи 17,162 млн сўм, иккиламчи уйлар 16,643 млн сўм, ижара эса 137,1 минг сўмни ташкил этди. Чорак давомида бирламчи бозор 0,9 %, иккиламчи 3,6 фоиз, ижара эса 3,2 фоиз қимматлашган.
Яккасаройда бирламчи уйлар ўртача нархи 15,682 млн сўм, иккиламчи 15,669 млн сўм, ижара эса 126,9 минг сўмни ташкил қилди. Ҳисобот даврида бирламчи ва иккиламчи уйлар мос равишда 3,2 фоиз ва 2,9 фоизга арзонлашган, бироқ ижара бозори 3,5 фоизга кўтарилган.
Шайхонтоҳур – марказий ҳудудлардан бири бўлиб, бу ерда бирламчи уйлар 16,241 млн сўм, иккиламчи уйлар 14,811 млн сўм, ижара эса 119,3 минг сўмни ташкил этди. Чорак давомида бирламчи бозор 1,7 фоизга кўтарилган, бироқ иккиламчи (-1,2 %) ва ижара (-6,3 %) пасайган.
Мирзо Улуғбек туманида эса бирламчи уйлар нархи 15,527 млн сўм, иккиламчи 13,964 млн сўм, ижара эса 109,2 минг сўмни ташкил қилди. Давр давомида бирламчи уйлар 3,7 фоиз, иккиламчи уйлар 2,6 фоиз, ижара эса 3,6 фоизга пасайди.
Юнусобод пойтахтнинг йирик туманларидан бири бўлиб, бу ерда уй-жой бозори пасайиш босқичида. Бирламчи нархлар 14,345 млн сўм, иккиламчи 13,929 млн сўм, ижара эса 99 минг сўм. Чорак давомида бирламчи уйлар 0,9 фоиз, иккиламчи уйлар 0,6 фоиз, ижара эса 1,9 фоизга арзонлашди.
Яшнобод туманида бирламчи бозордаги уйлар нархи 14,599 млн сўм, иккиламчи 12,907 млн сўм, ижара 95,2 минг сўмни ташкил қилади. Бирламчи уйлар 1,3 фоизга қимматлашган бўлса, иккиламчи (-2,2 %) ва ижара (-3,6 %) арзонлашди.
Олмазорда бирламчи уйлар 13,584 млн сўм, иккиламчи 12,695 млн сўм, ижара эса 95,2 минг сўм. Бирламчи (-2,7 %) ва иккиламчи (-2,1 %) пасайган, бироқ ижарада 5 фоизлик ўсиш кузатилди.
Чилонзор – бирламчи уйлар нархи 14,028 млн сўм, иккиламчи 14,323 млн сўм, ижара эса 96,5 минг сўм. Бу туманда бирламчи (-2,2 %), иккиламчи (-2,4 %) ва ижара (-1,5 %) пасайган.
Учтепа – ўртача сегментда жойлашган бўлиб, бирламчи уйлар 13,711 млн сўм, иккиламчи 13,251 млн сўм, ижара эса 86,3 минг сўм.
Бектемир – Тошкентнинг энг арзон туманларидан бири. Бу ҳудудда бирламчи уй нархи 10,219 млн сўм, иккиламчи 11,202 млн сўм, ижара эса 69,8 минг сўмни ташкил қилмоқда.
Сирғали – нархлар нисбатан арзон бўлиб, бирламчи уйлар 11,045 млн сўм, иккиламчи 11,071 млн сўм, ижара эса 78,7 минг сўмни ташкил этди. Ушбу ҳудудда бирламчи (-2,9%) ва иккиламчи (-3,1%) нархлар пасайган, ижара эса деярли ўзгармай қолиб, -0,1 фоизни ташкил этди.
