Телефон сизники, қачон олишингизни божхона ҳал қилади: Ўзбекистонга iPhone олиб кириш бир ойлик кутишга айланмоқда
Ўзбекистонда четдан олиб кирилган айрим смартфонлар қўшимча экспертиза учун 30 кунгача ушлаб турилаётгани айтилмоқда.
Фойдаланувчиларнинг сўзларига кўра, телефонини бир кунда расмийлаштиришни истаганлардан моделига қараб 400 доллардан 1 100 долларгача маблағ сўралмоқда.
Айни пайтда бозордаги тақчиллик туфайли маҳаллий дўконларда iPhone нархлари сезиларли даражада ошган.
Ўзбекистонда 6 ноябрдан мобил қурилмаларни олиб кириш ва IMEI кодларини рўйхатдан ўтказиш устидан назорат кучайтирилган. Бу ҳақда “Oblako” нашри Божхона қўмитаси матбуот хизматига таяниб хабар берди.
Қўмитанинг тушунтиришича, бунга IMEI кодларини қалбакилаштириш ва клонлаш, бошқа қурилмаларнинг идентификаторларидан фойдаланиш ҳамда телефонларни ноқонуний олиб кириш ҳолатлари сабаб бўлган. Айрим смартфонлар қўшимча экспертизага юборилмоқда. Текширув 30 кунгача давом этиши мумкин.
Фойдаланувчилар телефонларини расмийлаштиришда кутиш муддати ва харажатлар ошганидан шикоят қилмоқда. “Oblako”га мурожаат қилганларнинг айтишича, текширув вақтида қурилма аэропортда олиб қолиниши мумкин.
Хусусан, iPhone 18 Pro Max учун қарийб 150 доллар тўлаб, 30 кунгача кутиш ёки тахминан 450 доллар эвазига бир кунда расмийлаштириш таклиф этилаётгани айтилган. Бошқа мурожаатларда тезкор расмийлаштириш учун моделига қараб 400 доллардан 1 100 долларгача маблағ сўралаётгани қайд этилган.
Айни пайтда савдо нуқталарининг очиқ эълонларида ҳам нархлар ошгани кўринмоқда. Pinkod ноябрь бошида эълон қилинган нархлар билан 10 ноябрдаги таклифларни солиштирди.
Масалан, иккита eSIM билан ишлайдиган iPhone 18 Pro 256 GB ноябрь бошида рангига қараб 1 499–1 529 долларга таклиф этилган. Ҳозир шу конфигурация учун айрим дўконларда 1 649–1 690 доллар сўралмоқда.
512 GB хотирали версия бўйича фарқ янада каттароқ. Аввалги эълонларда унинг нархи 1 749–1 799 доллар бўлган бўлса, янги рўйхатларда қарийб 2 минг долларга етган.
| Модель | 4–8 ноябрдаги таклифлар | 10 ноябрдаги таклифлар |
|---|---|---|
| iPhone 18 Pro 256 GB, eSIM + eSIM | 1 499–1 529 доллар | 1 649–1 690 доллар |
| iPhone 18 Pro 512 GB, eSIM + eSIM | 1 749–1 799 доллар | 1 999–2 000 доллар |
| iPhone 18 Pro Max 256 GB, SIM + eSIM | 1 709–1 819 доллар | 1 849–1 950 доллар |
| iPhone 18 Pro Max 512 GB, SIM + eSIM | 1 999–2 149 доллар | 2 149–2 250 доллар |
Таққослаш турли савдо нуқталарининг очиқ таклифларига асосланган. Агар божхонадаги текширувлар маҳсулот етказиб беришни секинлаштирса, омборлардаги захиралар камайиб, бозорда тақчиллик юзага келиши мумкин. Бу эса нархларнинг янада ошишига олиб келиши эҳтимоли бор.
“Малика”даги сотувчилардан бири ҳам ўз каналида бозорда iPhone нархлари тахминан 150–200 долларга кўтарилганини билдирган. У қимматлашишни телефон олиб кириш ва IMEI расмийлаштирувидаги назорат кучайиши билан боғлаган.
