TBC Bank Uzbekistan ва Payme бошқаруви янги ташкил этилаётган компанияга ўтказилади

TBC Bank Group PLC (TBC PLC) Европа Тикланиш ва Тараққиёт Банки (ЕТТБ) ҳамда Халқаро Молия Корпорацияси (ХМК) билан ҳамкорликни кенгайтириш бўйича келишувга эришди. Ушбу келишув натижасида TBC’нинг Ўзбекистондаги бизнеслари TBC Digital номли ягона бошқарув компанияси остида бирлаштирилади. Янги тузилманинг бош директори Ника Курдиани бўлади.

TBC Digital – Ўзбекистонда рўйхатдан ўтган янги бошқарув компанияси бўлиб, у TBC Bank Uzbekistan ва тўлов иловаси Payme’ни ўз ичига олади.

2021 йилда ЕТТБ ва ХМК TBC Bank Uzbekistan’нинг 20% акцияларини сотиб олган бўлса, TBC Group улуши 60% ни ташкил этган. Янги акциядорлик келишуви доирасида директорлар кенгаши ва акциядорларнинг ваколатлари қайта белгилаб берилади. Шунингдек, ЕТТБ ва ХМК ўз улушларини TBC Bank’га сотиш, TBC Bank эса уларни сотиб олиш ҳуқуқига эга бўлади.

Янги бошқарув тизими доирасида TBC PLC, ЕТТБ ва ХМК TBC Digital’ни TBC Bank Uzbekistan ва Payme’нинг ягона эгасига айлантиришга келишиб олди. Улушлар қуйидагича тақсимланади:

• TBC PLC – 79,7%
• ЕТТБ ва ХМК – ҳар бири 10,15%

Аввалги TBC Uzbekistan бошқарув тизими бекор қилиниб, янги тузилма асосида бошқарув қайта ташкил этилади. Улар ўртасида янги акциядорлик келишуви ҳам имзоланади.

Молиявий жиҳатдан, ЕТТБ ва ХМК беш йилдан сўнг ўз улушларини TBC PLC га сотиш ҳуқуқига эга бўлади. Ҳисоб-китоб эса янги TBC PLC акцияларининг эмиссияси ёки пул маблағлари орқали амалга оширилади. Саккиз йил ўтгач, TBC PLC ҳамкорларнинг TBC Digital’даги улушларини пул маблағлари эвазига сотиб олиш ҳуқуқига эга бўлади.

TBC Bank Group бош директори Вахтанг Буцхрикидзе ушбу ўзгаришларга изоҳ берар экан, TBC Digital бошқарув компаниясининг яратилиши қўшимча синергия имкониятларини очиши, бошқарув стандартларини ошириши ва акциядорлар учун қийматни оширишга хизмат қилишини таъкидлади.